[A:39] nor bu chu shel dri ma med pa tshon sna tshogs pa dang phrad na de dang de'i kha dog mdzes pa 'dzin pa ji lta ba bzhin/ gdul bya rnams kyi khams dang bsam pa dang dbang po'i rim pa dang mthun par sprul pa'i gzugs kyi rnam rol bgrang bar dka' ba ji snyed pa dag tu ston pa yin te/ mdo las/ rgyal pos 'dul ba la rgyal po/ dge sbyong gis 'dul ba la dge sbyong / bram zes 'dul ba la bram ze/ dri zas 'dul ba la dri za rgan po'i gzugs su sprul to/ /zhes dang / sangs rgyas mnyam sbyor las/ res 'ga' zhi la res 'ga' khro/ /res 'ga' bgegs chen gdon mdzad cing / /skye dang ri bo thams cad do/ /zhes dang / gur las/ gang du snang nas kyang sems can gyi don mdzad do/ /so sor snang nas kyang sems can gyi don mdzad do/ /chang 'tshong ma dang / smad 'tshong mar snang nas kyang sems can gyi don mdzad do/ /zhes gsungs pas mtshon nas/ zhing khams la lar dkyil 'khor 'khor lo'i snang brnyan/ la lar mdzad pa bcu gnyis ston pa'i sangs rgyas dang / gzhan yang byang chub sems dpa' dang / nyan thos dang / rang sangs rgyas dang / mkhas pa paNDi ta dang / grub pa dang / rig pa 'dzin pa'i sa la gnas pa dang / a wa dhU ti dang / bhu su ku dang / ku sA li dang / 'khor los sgyur ba la sogs pa'i rgyal po dang / khams kyi rgyal phran dang / blon po dang / bram ze dang / dge sbyong dang / khyim bdag dang / yid bzhin gyi nor bu dang / gru gzings dang / zam pa dang / sman dang / zas dang / gos dang / ri bo dang / bya dang ri dwags la sogs pa mdor na snod