[A:250]/ /rje btsun rdo rje 'chang sgo rum pa chen po kun dga' legs pa'i blo gros rgyal mtshan dpal bzang po'i zhal snga nas kyi rtogs pa brjod pa'i gtam/ ngo mtshar yid bzhin gyi chu gter bzhad pa zhes bya ba/ dus gsum gyi bde bar gshegs pa thams cad kyi bdag nyid rje btsun de nyid kyi zhabs la gus pas phyag 'tshal zhing skyabs su mchi'o/ /brtse ba chen pos dus thams cad du rjes su gzung du gsol/ phun tshogs yon tan kun gyi rin chen gter/ /bgrang yas mkhas rnams dga' byed legs pa'i lam/ /rgya cher gsal mdzad blo gros mtha' yas gang / /bla ma'i drin gyis srid 'dir shis gyur cig /dpal ldan rigs kun khyab bdag gcig pu dga' bzhi'i dpal gyis legs 'khyud pa'i/ /zhi khro'i gar gyis blo gros mchog rnams rgyal ba'i go 'phang thob mdzad kyang / /skal dman 'dul phyir mtshan ldan bla ma dge ba'i bshes kyi tshul 'dzin pa/ /'phrin las dpal 'byor bzang po'i zhabs la lan gcig min par phyag bgyid do/ /bsam gyis mi khyab ye shes dpal mnga' khyod kyi yon tan 'di tsam zhes/ /sras bcas rgyal bas bskal brgyar brjod kyang mtha' rtogs nus pa ma yin na/ /byis blos gzhal ba'i smyu gu'i rtsom pa kye ma ngal mod de lta na'ang / /cha shas kyis kyang skal bzang snying la kun dga' bskyed phyir ngas 'di brtsams/ /bgrang yas rgyal ba'i blo gros rab gsal ba/ /rgya chen 'gro ba'i don slad rgyal sras tshul/ /mtsho skyes ltar dkar yid 'ong lhag pa'i lhas/ /bdag gi ngag la spobs pa mchog stsol mdzod/ /kun bzod 'dir ni ma byung mi 'byung 'byung bar dka' ba gang gi mtshan/ /bgrang yas bskal par