[A:634]pa'i bdag po rnams kyis sgrub mchod dus dran gyi thebs sogs gnas dgon mang por bsod nams rgya mtsho'i rlabs phreng dus las yol ba med par gyur to/ /mtha' yas zhing du grangs med rdzogs sangs rgyas/ /'gro 'dren ngal khur bzung bzhin gangs ljongs 'di'i/ /gnyen gcig bsu mar 'ongs pa'i DA ka'i tshogs/ /phyogs 'di kho nar brtse bral kye ma hud/ /sems can kun don ring nas thugs bskyed mgon/ /rtsod ldan duHkhas ches mnar gdul dka' rnams/ /bor nas chos dbyings bde ba'i klong gzims na/ /zhal 'ches rdo ba'i ri mo ming du zad/ /'og min zhing du ye shes them skas la/ /bshes gnyen mchog de 'byon par gsol btab nas/ /dbang gzhu'i gur khyim manda ra ba'i char/ /thabs kyis skal dman 'gro rnams 'bring 'di ci/ /tshur mthong skye bo mya ngan khang bu ru/ /brgyal mod gnas lugs rang ngo shes pa rnams/ /sems nyid dag pa'i ngo bo tshar pa rje/ /khyab bdag rdo rje sems gzhan dmigs su med/ /'on te chos kyi rgyal tshab gnas gsar bas/ /nyer mtshon bstan 'dzin dpyid kyi gser ldan ma/ /rngul chu'i rgyun 'bab de bzhin snyan brgyud chos/ /srid mthar mi nub 'phel der spro dga' brtas/ /de ltar rigs dang dkyil 'khor kun gyi khyab bdag snyan brgyud rgya mtsho'i ded dpon tshar chen chos kyi rgyal po'i rnam thar gsol 'debs sa skyong 'dar pa rin chen dpal bzang gis mdzad pa'i byin rlabs bdud rtsi'i chu gter rgod pa dang / de'i 'grel pa snyan ngag mkhan 'dar pa bsod nams lhun grub kyis bsgrigs pa legs bshad zla ba'i snang ba/ rtsa 'grel de gnyis la gzhi bcol nas chos 'khor yang rtse dang mnyan yod bya gshong gi mkhan po 'jam dbyangs dga' ba'i bshes gnyen gyis mdzad pa'i