[A:433]smin par mdzad/ sgyu lus 'byongs shing rmi lam la rang dbang thob pas dag pa'i zhing khams mang por bgrod cing der bzhugs pa'i 'dren pa rnams la chos zhu ba sogs lam rtags ngo mtshar ba mang du byung / shangs zur khang du bzhugs pas zur khang pa bsod nams bzang por grags/ mchog sred rnam sprul rje btsun kun spangs chen por 'jag lugs shangs chos stsal ba sogs mkhas grub kyi slob ma mang du byung zhing thos bsam sgom gsum gyis nyin mtshan dus 'da' ba zhig go/ !
bcu gnyis pa rnal 'byor dbang mo ni/stag tshang lo tsA ba dang dpon slob tu 'brel ba'i bag chags kyis tshar chen rin po ches sgra pa sku skye la 'jam dkar zhal gzigs ma'i rjes gnang gsan pa gnang zhing / rje btsun ma 'di ni g.yas ru'i sa'i cha bza' shing gi ra ba sogs kyis khor yug tu bskor ba'i yul ljongs yid du 'ong ba'i khang par rje 'di nyid kyi sku zhang gi rigs su bltams nas chung ngu'i dus gtsug lag gi yon tan 'ga' la bslab sbyangs mdzad/ srid pa'i bde ba mtha' dag me 'bar ba'i klong ltar gzigs pas bcos ma ma yin pa'i nges 'byung gi bsam pas khyim thabs kyi bya ba dug can gyi zas bzhin spangs te shes bya thams cad mkhyen pa 'jig rten gyi mig gcig pu stag tshang lo tsA ba shes rab rin cen rgyal mtshan dpal bzang po'i drung du rab tu byung nas tshul khrims mig gi 'bras bu ltar bsrung pas dge slong dbang mo zhes snyan pa'i grags pa phyogs kun tu khyab/dam pa de nyid gtso bor gyur pa'i mkhas grub du ma bsten nas dbang 'khrid man ngag gi zab chos rgya cher gsan/