[A:100] der zhag nyi shu rtsa drug gi bar la thams cad mkhyen pa rdo rje gdan pa'i lugs kyi dpal mgon stobs 'phrog dbang po'i gtor ma drag po'i 'chams dbyangs phyag len thams cad mkhas par sbyangs/ zla ba de'i nyer dgu la gtor chen gnang ba'i las pa bgyis te thog bcad/ gur gyi man ngag gi 'phro kha cig chig brgyud du zhus/ dud sol lha mo'i skor gsung chos kha cig kyang thob/ gtor chen thongs pa'i nub mnal lam gyi tshul du rje btsun rdo ring pa chen po dang / chos rje rdo rje gdan pa zhal rgyas su bzhugs pa dang mjal nas/ dpon slob gnyis kyi sku skye ba sngon ma kha cig lung bstan gsal bar byung / da lam gtor chen 'di rgyas par byas pas chos rje rdo rje gdan pa chen po mnyes pa yin nam gsung ba nas/ dga' zhing spro la ba spu langs/ mchi ma mang du shor/ re zhig had de lus pa zhig byung / mnal lam ming tu btags pa'i 'od gsal ngang / /rgyal ba rdo rje 'chang gnyis mngon sum gzigs/ /lkog gyur sngon gyi gnas 'ga' lung bstan thob/ /ngo mtshar 'di dang 'di 'dra gsung ba thos/ /a ho srid par 'khyams pas ches dub pa/ /bdag la nyid kyis ring mo zhig nas bskyangs/ /sngon gyi zhal bzhes bslu med bden pa'i mthus/ /'dir yang slob bshad snyan brgyud lhug par stsal/ /da dung khyed dang mtshungs par ma gyur pa/ /de srid mgon skyabs dpung gnyen gzhan med pas/ /yid ches dad dang gus