[A:106]gu ru rin po ches/ /ma rig mun pa sel ba'i dngos grub stsal du gsol/ gsung zhing byon pa dang slob dpon nang du zhugs pa thug nas byin rlabs zhus pas dngos grub dang gtor dbang gnyis ka thob/ de nas gzims chung du byon skabs zhu yig rten bcas phul gshis tshul zhus pas/ mdang rmi lam du shar 'di nas nyi ma zhig shar byung nas lung pa thams cad 'od kyis khengs pa zhig rmis/ da lam dngos grub 'gyed kha'i rten 'brel kyang legs/ bstan pa la phan pa zhig yong shas 'dug gsung ba sogs dgyes bzhin du zhal gyis bzhes dus sgrigs byas khong rnams 'khor byung / slar yang gtang rag dang 'phrin 'tshol rgyas par byas gdan 'dren la btang bas zla ba bcu pa'i tshes bcu la bde gsal nyid du phebs byung / de snang snga ma 'di rig 'dzin sangs rgyas byams bzang bya ba'i byang gter gyi bdag po de'i sku skye/ rta mgrin gyi sprul par lung bstan/ rnying ma gter kha nyi shu tsam gyi dbang lung mnga'/ chos nyid mngon sum gyi snang ba la mnga' brnyes/ slob dpon padma dang khri dngos su zhal gzigs/ gter mgon phyag bzhi pa dang bza' bdud rA hu la sogs bran du 'khol/ lhag par byang chub kyi sems 'byongs shing phan sems che ba'i mthar thug /'phral sbas pa'i rnal 'byor du bzhugs pa zhig yin/ bla ma de zla ba bzhi'i bar du bsten nas byang gter gyi chos tshan lnga brgya pa phrag gcig gtso bor gyur pa'i gter kha bcu tsam gyi dbang lung phal che ba zhus/