[A:168]yin/ dus de nas 'o yug sdings ma dgon par kye rdor yab yum 'jigs byed bcu gsum ma/ gdugs dkar/ kun rig /tshe dpag med rnams dang / bsreg shing rin cen sgang du/ 'jam pa'i rdo rje/ phag mo mngon 'byung / 'jigs byed bcu gsum ma/ gshed dmar lha lnga/ rnam 'joms ma Ni badzra/ kun rig tshe dpag med rdul tshon la brten pa'i sgrub mchod kyang legs par tshugs pa bzhin/ 'dzugs pa'i dus bdag rang gis rdo rje slob dpon bgyis pa'i phyag len phra mo tshun bab chol du ma song ba bgyis so/ /zla ba bdun pa'i nang du 'o yug zam 'tsher du dbang cha lnga la dpal rdo rje gzhon nu sa lugs kyi dbang legs par byas pas/ phyogs de na grwa pa rgan gzhon thams cad dbang gi brda chad tsam yang ma chags par sngags par khas len zhing / tshogs 'khor du ming btags pa'i chang 'thung mang po byed pa zhig gda' ba de la cung zad phan nam bsam/ de nas 'o yug sdings mar mnga' ris chos kyi rgyal po sprul sku rig 'dzin chen po spyan drangs dpon slob nyi shu phyin la zhag nyi shu rtsa 'dren bsnyen bkur zhing / gser/ g.yu/ rta/ khrab/ khro/ g.yag sogs dgongs par gang yod kyi dngos po phul te/ dpal bde mchog e ka dza ti'i smin grol yongs su rdzogs pa rdo rje slob dpon bdag po chen po'i bar rje nyid la ji ltar mnga' ba thams cad yongs su rdzogs par thob/ rgyud sde'i nying khu mkha' 'gro'i snying khrag 'di/ /kha ba'i ljongs 'dir nub la nye ba'i dus/ /rgyal yum dbang mos lung bstan ji bzhin du/ /legs par 'bad