[A:202] rig 'dzin sngags kyi sdom pa'ang rgyud sde bzhi po so so'i rtsa ba dang yan lag gi ltung ba rnams kyi rang bzhin sogs cha tsam shes la/ khyad par bla ma yab sras la mi phyed pa'i dad pa ci mdzad khyed mkhyen rgyun chags su ldan pa'i don gyis/ yan lag tshang ba'i ltung bas ma phog pa'i khungs yin la/ dus rgyun du ting nge 'dzin gyi dbang dang / zla ba re bzhin rdul tshon nam ras bris kyi dkyil 'khor gang rung du dbang yang nas yang du len pa 'dis sngags sdom rgyud ldan du 'byung re ba lags/ de ltar sdom pa gsum gyis gzhi bzung nas/ ris med pa'i chos la thos bsam bgyis tshul mdo tsam bshad na/ sngar smos pa ltar gyi chos mchog tu sku drin che ba'i bla ma lnga nas bzung ste/ rje btsun dbon rin po che ngag dbang brtan pa dang / bdag chen chos kyi rje rtse gdong pa'i drung du lam dbang re thob pa dang / bdag chen khri thog rin po che dang / chos rje spre chung rin po che las bla ma'i rnal 'byor tsam dang / gnyag ston chen po bkra shis sgang pa las sme brtsegs kyi khrus dbang zhig thob pa yan chad du bla ma dam pa sum cu rtsa gnyis mnyes par bgyis te chos kyi tshul ji snyed cig thob mod/ bla ma gang las gang thob pa dang / de dag kyang brgyud pa rnam par dag pa gang las 'ongs pa dang / de dag gi nang gsel gyi dbye ba phra mo ji snyed yod pa rnams ni bdag gis dam pa'i chos thos pa'i tshul gsal bar ston pa yid bzhin gyi nor