[A:32]yid kyi bung ba de/ /lhan skyes spro ba'i bro gar ci yang rtsen/ /khyod kyis byis pa'i dus su gang bsams pa'i/ /khur de phyed tsam khyer na'ang mkhas grub cig /'byung la the tshom med mod da lta'i bar/ /don med las 'di gang gi skyon yin kwa ye/ /kwa ye sems la sems kyi gros thob dang / /dang po'i dus nas yid la smon pa gang / /gang de don med gyur na ma legs kyi/ /gyi nar ma 'dug blo skyed mi 'don nam/ /rang lo brgyad lon pa lcags mo yos kyi lo ston zla 'bring po 'bru bcud thams cad phun sum tshogs pa'i dus bkra shis kyi gtsug lag khang dpal ldan theg pa mchog gi pho brang du mkhan po dus gsum rgyal ba thams cad kyi bdag nyid don gyi slad du mtshan nas smos te kun dga' legs pa'i zhal snga nas/ gtsug phud 'breg pa'i dge slong gnas brtan mkhas pa nam mkha' gzi brjid/ 'dul ba 'dzin pa nam mkha' don grub sogs dad pa'i dge 'dun lnga'i dbus su rab tu byung ba'i sdom pa blangs/ ming mkhyen brtse'i dbang phyug bstan pa'i rgyal mtshan dpal bzang po zhes btags/ dga' ston rgya cher bsgrubs te/ shAkya'i sras kyi khongs su chud pas snying la sim pa ci yang thob par gyur to/ /me dang dug dang sgram chen sbrul gyis 'khrigs pa'i nags na rtse ba bzhin/ /rnam mang skyon brgyas nye bar 'khyud pa'i khyim gyi dga' ba spangs nas 'dir/ /yid 'phrog ga bur gzegs mas bran pa'i ha ri'i nags klung 'jam po dang mtshungs pa/ /thar pa'i them skas so so thar zhes ming tsam gyis kyang snying la sim pa ster de bdag