[A:44]brgyud pa gsum las 'ongs pa'i man ngag thams cad yongs su rdzogs par thob/ grol ston tshogs kyi 'khor lo/ bsags sbyang gi maNDal gyi nas khal lnga bcu lhag pa/ gser zho gsum gyis gtsos pa'i 'bul ba dpangs gang che dang bcas pa'ang phul/ bdag la rten khebs ma Ni ma hor dus shig /'jam dbyangs kyi gser sku zhig /dar dur kha kha gru yangs pa zhig rnams gnang / chos 'di'i bdag po re ba yin pas thos bsam dang nyams len la 'bungs/ dpe tsam ltas pas shes pa'i chos ma yin pas bla ma'i gsung sgros la nan tan mdzod/ ster byin 'di la gnang dpangs shig mi gda' ste go ba zhig yod pa yin gsung ngo / /rgya chen mdo rgyud rgya mtsho bsrubs pa'i bcud/ /rgya bod mkhas grub bye ba'i snying gi nor/ /rgya chen zab mo'i mthar thugs gsung ngag chos/ /rgya lam rnyed par dka' de bdag gis rnyed/ /bla ma'i gsung ngag dbyangs snyan lha yi rnga / /yid dang rna dbang tshim la mi ngal ba'ang / /byis pa'i blo yi gam la cher ma zin/ /da dus snying nas dran kyang ci zhig bya/ /yab rje'i zhabs pad bsten dus byis pa'i blo/ /mno bsam cung zad rnyed tshe bdud dbang song / /rang dbang thob tshe dam pa chos dbyings byon/ /ji ltar bgyis kyang bsod nams bgo skal zhan/ /'on te dad pa'i zhing sa mchog tu gshin/ /'bral med mos gus dam tshig chu yis brlan/ /yab gcig gsung gi sa bon skyon med thebs/ /nam zhig 'khrul med 'bras bu 'byung ngam snyam/ /de'i dus lam sbas bshad nyams khrid yid ches par zhus/