[A:271]dang bcas te/ gus pas bsten pa'i mod la/ thog mar dpal dus kyi 'khor lo'i smin byed kyi cho ga yongs su rdzogs pa'i rdul tshon gyi dkyil 'khor bzhengs pa'i las thig dang / tshon gyi 'bri ba'i 'du byed kyang yol bas phyag dar ma mdzad pas shin tu spus gtsang ba byung bas rdo rje slob dpon chen po shin tu mnyes par gyur/ de nas zhi ba zhes pa sa mo bya'i lo nag pa zla ba'i dkar phyogs kyi stong pa gsum pa'i tshe slob ma lhag gnas kyi cho ga dang / rdzogs pa gsum pa'i nya la bab pa'i tshe byis pa ltar 'jug pa'i dbang bdun/ dbang gong ma bzhi'i thun mong ma yin pa bdag po chen po'i dbang dang bcas pas smin par mdzad nas gnas de nyid du zab lam mthar thug rnal 'byor yan lag drug gi don 'khrid gsan pa'i tshe sngon 'gro rnams la bsags sbyangs kyi rtags khyad par can dang / dngos gzhi mun mtshams dam po la mi g.yo sum ldan gyi byad bcings dang bcas sor sdud kyi dmigs pa zhag lnga tsam song / rtog med 'od la srid 'das kyi gzugs mtha' yas pa'i gzigs snang mun nang du sha'i mig la mngon sum du snang ba'i dbyibs/ ril ba lta bu dang / ral gri rtse gsum sogs phyag mtshan 'od zer 'phro ba sdig pa rwa can gyi dbyibs/ dung dkar sgra dang bcas te mgo bo gyen du bstan pa zhig sku mkhris kyi g.yas phyogs nas thon nam mkha' la g.yon phyogs su bskor te thim 'gro ba gzigs/ mun mtshams bsdams pa'i gseng bug pa phra mo yungs 'bru tsam zhig yod pa la ched du dmigs pa'i lta stangs kyi mnyam par bzhag pas bug pa de je che la dkar khung gi rnam par song ste mun khang gi nang thams cad nyi ma shar