[A:504]gnyis pa'i nyer lnga la chos dbyings su zhugs pa'i tshul bstan/ de yang don la nyer lnga nas gnam gang gi bar tshogs lam gsum nas sbyor lam bzhi'i bar sngar ma bgrod pa'i lhag rnams bgrod/ gnam gang gi tshe rtsa mdud dang po grol grub mtha' 'khor 'das dbyer med snyogs/ sa dang po rab dga' rnyed par gdon mi za snyam pa'i nges pa brtan po yong / gzhan rnam shes bu ga dgu po gang rung nas thon pa'i rtags sku la dri nga ba dang / byang sems dkar dmar bud pa la sogs pa'i rtags ci yang ma byung / dbu'i tshangs phug cung zad 'phags 'dug zer ba 'dug kyang tshangs phug 'bur tsam pa de ni snga mo nas yod/ phyis 'phags nas 'bur ba min par mngon/ gnam gang nas gdung sgam bcos gos dar gyis gril mchod pa 'bul ba'i rten du bzhugs su gsol/ de nas ya ga chos sdings su gsol 'debs kyi tshe ya ga chos sdings dpon slob rnams kyis 'du khang du rnam par snang mdzad kyi chog gra btsugs/ sgyi chu ba'i rdo rje 'dzin pa rnams kyis bla brang du dgyes rdor gyi chog gra btsugs/ dgon gnas gzhan rnams su rang rang gis chog gra btsugs/ kho bo cag gi 'du khang du bsngo ba la yud tsam ma gtogs gdung gi sku mdun du dgyes mdzad cho ga lhur len byas/ gang sku'i dkyil 'khor dag zhing gshegs na yang / /thugs rje'i lcags sgrog 'bral ba med mthong nas/ /mig la mchi ma 'dzag kyang sems la ni/ /rab dga'i ting 'dzin mi g.yo brtan par gyur/ /tshul ldan ngur smrig 'dus pa'i pho brang du/ /phyi nang dkyil 'khor zhal phye mchod cing bstod/ /ting 'dzin sngags rgya cho ga'i dbyangs snyan gyis/ /'jam mgon bla ma dgyes pa'i mchod sprin