[A:419]tog utpal sngon po tshad snga ma bzhin la/ 'dab ma rnams sngar bas shed cung zad chung ba 'dra ba mthong / de'i tshe sems la dga' spro dpag med shar/ lha dkar po rnam gnyis kyis byin gyis brlabs pa'i mtshan ma cung zad yin nam snyam/ blo shes rab 'phel byed dkar po bzhi/ /thugs brtse bas rjes bzung 'jig rten dbang / /mgon mkhyen brtse 'bral med tA ra ma/ /lha khyed kyis bskyangs 'di skal ba bzang / /lha padma dkar po'i spyan ras 'dzum/ /sems ngal 'tsho'i lung bstan gsung dbyangs snyan/ /tshe sngon nas thugs rje'i lcags kyus sbrel/ /dus da lta bde ba khyed kyi drin/ /gnas der gzhan yang lha phran mang po'i bsnyen pa yang byas/ gzhung lugs mang po la shar sbyangs dang lta rtogs 'phel po byung / rlung 'khrul 'khor sogs kyang rtsol ba chen po byas pas/ 'od gsal gyi rtags dang nyams snang bsam gyis mi khyab pa byung ngo / /de nas mang mkhar rmu'i brag shod zer ba der zla gcig tsam bzhugs pas/ sngar btsan thabs ye mi thebs pa la phyis rlung bum can gzung tsam gyi btsan thabs rang thebs la 'byung zhing lus la bde ba dang / sems la 'char sgo sna tshogs 'char ba/ mtshan dus rmi lam rang zin dang gnyid log pa la brod pa skye ba sogs dge sbyor 'phel po byung ba yin/ de nas mu gu lung du dpon slob gsum gyi zla gcig tsam bzhugs/ de dus kho bo la gzhung mang po blo la yod kyang sdom gsum rab dbye nyin re la tshar re chag med byas/ gzhan dbu ma 'jug pa/ byams chos lnga/ mngon pa mdzod/ rigs pa drug cu pa/ chos dbyings bstod pa/ brgyad stong don bsdu/ nyi shu pa/ sum cu pa sogs skabs skabs su re mos kyis bton/