[A:119]rnams kyis/ /dkyil 'khor sgrub mchod zang zing mchod pa sogs/ /rlabs chen dgongs pa gzhan don mthar phyin pa'i/ /gsol btab smon lam mchod rten rgya chen bsgrubs/ /gzhan yang bla ma dam pa 'das pa'i lo zla tshes grangs dag /nges par bzung ste mchod pa byas gyur na/ /bskal ba bye bar bsags pa'i sdig bcoms nas/ /shin tu mi bzad gshin rje'i grong las thar/ /gdugs dang rgyal mtshan rol mo 'phan la sogs/ /dung dang rnga chen rol mo sogs kyis mchod/ /mchod pa bcu dang bkra shis tshig bsgrags na/ /bskal pa ther 'bum bsags pa'i las dag nas/ /zag med chos sku thob nas gzugs sku yi/ /snang ba skyes nas srid gsum sdug bsngal sgrol/ /bdun pa 'phrin las kyis bstan pa'i rgyun ji ltar gnas pa'i tshul ni/ rgyal ba sras dang bcas pa'i mdzad pa dang / rje btsun 'di'i mdzad 'phrin gnyis kun 'gro'i ngo bor gnas pas/ de dag gi 'phrin las 'khor ba ji srid ma stongs kyi bar gnas shing / de bzhin du rje btsun 'di nyid kyi 'phrin las kyang 'jug cing gnas par nges te/ ji skad du rje btsun gyis/ ji ltar nyi ma'i dkyil 'khor ni/ /'od zer dpag tu med 'dres shing / /rtag tu bya ba gcig la 'jug /'jig rten la yang snang bar byed/ /de bzhin zag med dbyings na yang / /sangs rgyas dpag tu med 'dres shing / /mdzad pa gcig ni mdzad pa la/ /ye shes snang ba mdzad par 'dod/ /gzhan yang sku'i bkod pa tshad med pas/ /sangs rgyas kyi zhing tshad med par gdul bya'i tshogs tshad med pa la/ bskal pa tshad med par chos kyi 'khor lo tshad med pa bskor nas sems can 'khor du ma bsdus pa rnams bsdus/ bsdus pa rnams smin/ smin pa rnams grol/ grol ba rnams mthar phyin pa'i go 'phang mchog la bkod/