[A:22]ti bco brgyad/ gzhan yang gsung rab du ma'i skyes 'bul ba dang bstan pa'i rnam gzhag la rdzong bda' mdzad/ mi dbang de nyid kyis byang chos kyi rgyal po mnga' bdag nam mkha' rin chen pa la/ nged kyi nang rje gcig gi bu chos mdzad 'di bstan pa'i rnam gzhag la rjod bda' byas yod pas/ mgo 'don bdag rkyen yags po dgos tshul gyi phyag dam rten bcas bzang po dang / rje nyid rang la yang gsol ja gos dar la sogs pa'i gnang sbyin dang zhal ta bzang po mdzad/ rje nyid kyis chos grwa chen por dge 'dun 'dus pa rgya mtsho'i dbus su rgyal ba'i gsung rab mtha' dag dang / bka' chen bco brgyad la gra bskor mdzad/ khyad par du 'dul ba mdo rtsa la bshad pa nan che ba mdzad/ de'i dus tshogs kyang shin tu che ba yod pa la dang po 'jigs zhum pa byung / de rjes bsam blo la tshogs pa dge 'dun 'di tsam gyi dkyil du bshad pa rgyab chog pa tshogs bsags la dgongs pa shar te/ dge 'dun dpon slob spyi bor bsgoms nas mdzad pas sngar mi thon pa rnams kyang thon zhing khra lam lam yod pa zhig byung ba dang / mkhas pa thams cad yid mgu zhing mthun snang du grub par gyur/ byang chos kyi rgyal pos sger gyi bzhugs gral mdzad/ drung rin chen dbang gi rgyal po bas khyed la bstod bsngags legs po mdzad 'dug pa/ ji lta ba bzhin gda' lags/ khyed 'di phyogs bzhugs chog pa byung na nged kyis dgon pa chos gzhis sogs gang drag byed pa yin te/ rin spungs nas dpon blon gyis dgongs pa khrol mi yong / gang ltar kyang khyed kyis bstan pa'i bya ba 'di ga'i mu bskyangs pa'i lhur len pa zhig mdzad dgos gsung