[A:86]po che'i bka' sogs nas/ da rang mi thub pa 'dra bsam/ lo dang / bde ba can/ spar phu sogs kyang bdag byas/ rang 'dod spangs pa'i grwa rigs sbyin bdag rnams la chos dang sku rim sogs kyis rang rang gi thugs 'dod dang mthun pa'i phan ci thogs byas/ de yang rje 'di nyid kyi rnam par thar pa la/ nam langs mun dang nyi shar rnams kyi tshul du gnas pa las/ phyi ma'i dus shig sa skya nas bdag chen sngags 'chang chos kyi rgyal po de nyid dang / khri rin po che dang bcas pa mkhar rtser phebs/ bdag chen rin po che'i gsung nas/ spyir sangs rgyas kyi bstan pa 'di mar 'grib la song ba dang / khyad par du sa skya pa'i bstan pa 'di yang da lta gang na'ang dar rgyas che rgyu rang mi 'dug rung / chos rje'i drung gis dbus phyogs 'dir bstan pa la phan zh-ing sa skya pa'i rkang zin pa zhig byung 'dug /nged tshos sa skya pa'i zhal ngo chibs rags bsgrigs nas yong dus/ lha sa brag sgo'i thad du star sdong dpon po dang 'phrad tshe rbud shar re 'gro yang / chos rje'i drung la sa dga' ldan thams cad mthun grub pa 'dug /dpal ldan lhun grub rtse 'di yang 'phan yul lung pa'i bde skyid la phan pa dang / sa skya pa'i bstan pa la phan pa'i sa gnad cig yod pas/ khyed dpon slob kyis 'dzin dgos phebs/ bdag chen zhal snga nas brgyud pa'i mgon po'i skor sogs/ sa skya pa'i pha chos de rnams chos rje tshar pa la zhu 'dod yod pa yin kyang / mi ngan gyi byed par brten/ rten 'brel 'grig pa zhig ma byung / de rnams mtshams babs zhig tu bsod nams dbang po la 'phrod