[A:144]su bab ba'i chos tshul du mas rang rang gi blo dang mthun par bkri bar mdzad do/ /de ltar gong du smos pa ltar chos mthun gyi mdzad pa kho na ma gtogs/ gzhan gyi g.yeng ba thams cad brgyang bsrings te rim gnyis zab mo'i nyams bzhes kho na la rtse gcig tu brtson par mdzad cing / lhag par mtshan mo'i cha la mnal cung zad kyang mi mdzad par mnyam bzhag kho nas dus 'da' bar mdzad pas/ snod bcud thams cad dag pa'i snang bar 'char ba sogs dang / ngo mtshar ba'i ltas brjod kyis mi lang zhing kun gyi blor shong ba yang dka' mod/ 'on kyang cung zhig tsam dad ldan log rtog chung ba bskul ba po dag gi ngor brjod na/ dpal sbug tu kye rdo rje'i gzhi bsnyen sbyin sreg gi kha skong dang bcas pa'i skabs shig thun gyi sgang tsam mnal dang 'od gsal 'dres pa'i gsal snang la bud med gzhon nu yid du 'ong ba gnyis kyis ka pA la bdud rtsis gang ba re re phul nas gsol ba'i rjes sngar dang mi 'dra ba'i gzhan gyis brjod du med pa'i bde chen gyi ye shes thugs la 'khrungs shing / de'i tshul 'jam pa'i dbyangs mkhyen brtse'i dbang phyug la zhus par/ de ni kha sbyor yan lag bdun ldan thob pa'i ltas su 'dug gsung pa'i lung bstan dbugs dbyung gzengs bstod mdzad do/ /skabs shig tshes bcu'i dus ma hA gu ru rdo rje drag po rtsal thugs nyams la gsal bar gzigs gsung / bdag la gsung ngag rin po che gnang ba'i rgyu dbang gi skabs su/ rje nyid bzhugs pa'i mdun gyi nam mkhar tshar chen chos kyi rgyal po dang / thams cad mkhyen pa mkhyen brtse'i dbang phyug yab sras gnyis dbang ma grol bar