[A:215]chu ltar shugs drag rba rlabs dang bcas 'bab pa zhig byung / 'on kyang gsol 'debs kyi tshig 'ar ma 'ur ma byas/ mdor na yab sras de gnyis kyi thugs rje las/ lam 'di lta bu'i nyams len gyi bgrod pa zin/ gang byas tshabs su 'gro ba dang ci byed chos su 'gyur zhing gzhan phan du 'gyur ba/ bla ma dang yi dam tha mi dad du 'grub pa sogs ni cung ma yin nam/ gang ltar de gnyis la tha dad yod pa ni ma shes/ rgyud nas zla drug sgom pa'i sbyor ba zhes pa rdzogs ldan la dgongs sam snyam/ snyigs ma lnga'i dus 'dir de nyid bzhi 'gyur gsungs pas/ sku mthong gsung thos ni lta ci rmi lam du rgyud nas gsung ba'i bsnyen rtags phran bu byung kyang thams cad bris pa la yid ches chung bas thang cig phaT/ he ru ka dpal bdag med lha dgu'i tshogs/ /tshogs drug yul snang khyod kyi rol par shar/ /dag bya dag byed 'khor 'das zung 'jug tu/ /rtogs pa'i rnal 'byor nga rang zhe blo bde/ /bskal bzang thog ma'i sangs rgyas kun tu bzang / /chos dbyings gsung gi nyi ma gzi 'od 'bum/ /blo ldan shes rab rgyas pa'i pad tshal du/ /lhungs ma thag tu kun dga'i yal 'dab rgod/ /brjid pa'i sku dang 'dzum pa'i zhal bzang ni/ /mthong thos dran pas srid zhi'i dpal 'byor rnams/ /dge mtshan srid mthar rgyas mdzad rdo ring pa/ /sras kyi dpa' bo 'phrin las kha lo sgyur/ /stong nyid smra ba'i khyu mchog tshar pa rje/ /zab dang rgya che'i snyan brgyud snying po ni/ /rang sems chos sku'i 'bras bu 'di na'o/ /de nas zla ba dgu pa'i nang du shangs yul skyid pa'i bya 'dab smyug rgyal khang du sleb/