[A:361]mkhan po mang thos grags pa rnam rgyal/ bzang ldan mkhan po rin po che lha dbang pa/ 'phags sde mkhan po ngag dbang chos bzang po sogs bla ma rang bcu phrag tsam gyis gtsos pa'i tshogs pa bdun cu skor la gsung ngag lam 'bras cha lag yongs rdzogs smin rgyas su gnang / slar yang dgon gsar du gsung ngag lam 'bras tshar gsum dang / bla brang rdzong du phyis kyi bzhugs sa'i mthil yang mdzad/ thub bstan slob dpon byang chub 'od zer dang / nyi shar ba dge ba'i bshes gnyen rgya mtsho ba sogs so so'i zhu ngor gsung ngag lam 'bras tshar gsum dang / rab byung bsnyen rdzogs mang po gnang zhing / lcags mo bya lo dgung lo lnga bcu par phebs pa'i skabs shig rtse gdong gdung brgyud zhabs drung rnams kha'u snyan brgyud kyi zab chos rnams gsan par bzhed nas bla ma kha shas gsung brtag gnang bar dam pa 'di nyid chug ste/ bdag chen khri rin po che'i bka' tham dang bcas/ thog mar pho nya'i rgyu 'grul gyi dus skabs gza' tshes sogs bsgrigs par gnang / slar chibs dre'u phyag g.yog phebs bsu dang bcas te/ dpal rtse gdong phyogs las rnam rgyal dga' ba'i tshal de nyid du gdan 'dren par mdzad/ zhal mjal dang bstun dam pa 'di'i sku'i gzi 'od/ gsung gi mkhyen yangs/ thugs kyi ting 'dzin/ byin rlabs mdzad pa/ 'phrin las thams cad chos nas ji ltar 'byung ba bzhin tshang ba'i rje btsun rin po che'i mgur las/ khong mkhyen rgya can la man ngag med/ /man ngag can la mkhyen rgya med/ /gnyis ga tshang la sgrub tshugs med/ /