[A:374]ja phyag tu bzhes nas ja mchod kyi rnam pa mdzad pa'i mu la rgyun ring po'i bar mdun gyi bar snang la spyan gzigs/ kun dga' bzang po 'a'i kun dga' bzang po zhes yang yang gsung ba dang / dbu gug gug mos pa'i rnam 'gyur du ma mdzad cing rje btsun gong ma lnga la gsol ba 'debs na kun dga' bzang po la gsol ba btab pas gong ma lnga char la gsol ba btab pa'i go chod par 'dug ces gsung 'dug cing / dus rgyun du yang rje rdo rje 'chang gi gsung dang mdzad pa 'di lta bu zhes yang yang bsngags brjod gnang ba dang / da lta'i mkhyen rab dang thugs rje tshad med pa'i bdag nyid shar chen chos kyi rgyal po 'jam dbyangs shes rab 'byung gnas kyis ngor e waM chos ldan gyi lugs gnyis kyi 'dzin 'bras dpe med byung ba la yang / zhabs drung 'byung gnas lags kyis ngor dgon pa la zin gso dpe med byung / khong zhabs pad brtan dgos zhes yang yang bsngags brjod gnang ba'i thugs zhen shin tu che ba rang gnang gin 'dug pa sogs ni rgyal ba rdo rje 'chang chen pos rjes su bzung ba'i rtags su gdon mi za la/ rdo rje 'jigs byed kyi gsung bsnyen gyi skabs shig mdun gyi nam mkha' la 'jigs byed kyi dkyil 'khor shin tu gsal bar gzigs pa'i mtshan ma byung 'dug cing / thub bstan dge 'phel du 'jigs byed lha bcu gsum gyi dbang tshar kha shas gnang skabs shig bdag kyang dbang gral der yod skabs dbang bshad kyi 'phros shig la tshar pa chos rje nas nga'i bar la rdo rje 'jigs byed 'di la byin rlabs kyi brgyud pa gzhan dang mi 'dra ba zhig yod gsung ba dang / rgyun du yang 'jigs