[A:343]khyab 'byung ba'i rten 'brel gyi sgo du ma sgrig par mdzad pas na spyan snga rje 'di yang bka' drin che ba'i mgon gcig tu snang lags so/ /de'i skabs shig ngor e waM chos ldan rdo rje theg pa'i pho brang chen po nas yongs kyi bshes gnyen dam pa grub chen dkon cog dpal ldan spyan snga rje de nyid la snga sor mdo mkhar du chos kha yar gsan pa'i 'phros gsan pa sogs la thub bstan yangs pa can gyi chos grwa chen por phebs nas gong du chos gsan pa dang / de mthun thub bstan tshogs chen slob dpon rje dbang phyug dpal bzang sogs dang bcas par thugs rje chen po skyer sgang lugs kyi rigs gtad dmar 'khrid tshems bu lugs/ de'i 'khrid yig mkhyen rab chos rje'i mdzad pa'i lung / 'jam dbyangs dmar ser/ dzam bha la ser po'i rjes gnang rnams gnang ba yang dam pa de nyid kyis gsan gsungs la/ sku na phra ba'i skabs nas bzung thugs rab che ba dang dul ba'i yang rtser grags 'dug cing / rje dbang phyug dpal bzang de nyid la bslab sbyong dogs dpyod zhu sa'i mthil gnang ste/ phar tshad/ dbu sdom/ 'dul mdzod/ bshes spring / spyod 'jug sogs kyis gtsos pa'i gzhung lugs mtha' dag la thos pa rgya mtsho'i mthar son pa gnang la/ de yang gzhan gyi lo dang zla ba'i blo skyed las dam pa de nyid kyi chos thog re re'ang skyed che ba sngon gyi sbyangs shugs kyi yod par grags 'dug /dgung lo bco brgyad kyi steng du bod kyi rdo rje gdan dpal ldan sa skyar 'jam mgon gnyis pa sa skya paNDi ta'i gsung / rigs gter rang