[A:༤༠༢]ཀྱིས་གནང་པའི་ཁྱད་པར་བུ་ལུགས་ཀྱི་བདག་པོ་ཆེན་པོའི་བཀའ་དབང་གི་དུས་དབོན་རིན་པོ་ཆེ་དཀར་ཆས་སུ་མཛད། དབང་སྟེགས་ཀྱི་ཁྲིར་ཆོས་ཀྱི་རྒྱལ་ཚབ་ཆེན་པོར་མངའ་གསོལ། སློབ་དཔོན་ཆེན་པོའི་སྐུ་ཚབ་གཏེར་བྱོན་ཡིད་བཞིན་ནོར་བུ་དང༌། ཆོས་ཀྱི་རྒྱལ་པོ་འཕགས་པའི་ཐུགས་དམ་བསྙེན་ཕུར་ཐམས་ཅད་མཁྱེན་པ་རང་གི་འབྲལ་སྤང་མ་དང་བཅས་གནང་སྐྱེས་སུ་སྩལ་བ་བསྟན་པ་གཏད་ནས་ཐམས་ཅད་མཁྱེན་པ་ཉིད་རིང་པོར་མ་ལོན་པར་གསང་བདག་གི་དྲུང་དུ་གཤེགས་པའི་སྔོན་འགྲོར་སྣང་ཡང་རྗེས་འཇུག་རྣམས་དོགས་གནས་ཙམ་ཡང་མ་བྱུང་བར་མངོན། ཚར་ཆེན་ཆོས་ཀྱི་རྒྱལ་པོ་ཞིང་འདིའི་བཀོདཔ་བསྡུས་པར་ཀུན་མཁྱེན་མཁྱེན་བརྩེའི་ཞབས་ཐུགས་སྣ་བསྟུངས་ཏེ་ལྕང་ལོ་ཅན་དུ་གཤེགས་པའི་ཐུགས་འདུན་དྲག་པོ་དང་ལས་འཕྲོ་གླིང་པའི་ཆོས་བདག་ཡིན་པར་དབུས་གཙང་སས་བསྐལ་བའི་ངོས་མ་ཟིན་པར་དུས་ཐོག་ཏུ་མ་འཕྲོད་པའི་རྟེན་འབྲེལ་འཕྱུགས་སྐྱོན་གྱིས་ས་ཕོ་འབྲུག་ལོ་མཛད་པ་ཐ་མ་བསྟན་སྐབས་རྗེ་འདི་བོ་དོང་བཀྲ་ཤིས་སྒང་དུ་ཡུམ་དང་ལྷན་ཅིག་ཏུ་བཞུགས་པའི་ཚེ། འཇམ་དབྱངས་བྱང་གླིང་རྗེས་སྲུང་འཁོར་མཛད་ཅིང་ཉིན་རེ་བཞིན་གྲ་ལྔའི་དབང་ཚར་རེ་གནང་བས་དབང་ཆོག་ཕལ་ཆེར་ཐུགས་བློར་ཟིན་པ་བྱུང༌། སྐབས་ཤིག་ཐམས་ཅད་མཁྱེན་པ་སྐུའི་རྣམ་པ་དངོས་གཞི་འདྲ་བ་ལ་དབུ་སྐྲ་ཟིང་ངེ་བ་ཕྱག་སྟབས་འདི་ཡིན་མེད་པ་ཞིག་ཉི་མའི་དཀྱིལ་འཁོར་གྱི་དབུས་སུ་བཞུགས་པ་གསལ་བར་གཟིགས་པ་ནི་བར་དོ་ཡེ་ཤེས་ཀྱི་སྐུས་མངོན་སུམ་དུ་རྗེས་སུ་བཟུང་བར་འདུག་ཅིང་གཟིགས་སྣང་ལ་ཇི་ལྟར་བྱུང་བའི་བྲིས་ཐང་བཞེངས། རྗེ་བླ་མ་བསླབ་གསུམ་