[A:༤༠༡]མཛུབ་མཛད་པས་ཕར་བཟློག་པ་དེར་འཁོད་ཀུན་གྱིས་མཐོང་བས་ཡ་མཚན་དུ་གྱུར། བོ་དོང་དུ་བཞུགས་དུས་མདུན་གྱི་ནམ་མཁར་མགོན་པོ་ཚེ་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ་ལོངས་སྐུའི་ཆ་ལུགས་ཅན་མཚན་དཔེའི་གཟི་བྱིན་འབར་བ་ཞིག་གཟིགས་པ་ནི་དགུང་ལོ་བརྒྱད་ཅུར་ཉེ་བའི་བར་བསྟན་འགྲོའི་དོན་དུ་བཞུགས་པའི་དགེ་མཚན་དུ་མངོན། ཐམས་ཅད་མཁྱེན་པ་ཕྱོགས་གང་དུ་ཕེབས་ཀྱང་རྗེ་འདིའི་དྲུང་དུ་འཁོར་བའི་ཁྱི་རྣམས་ལ་ཟན་སོགས་ཀྱི་སྐུ་སྐྱེས་རེ་གནང༌། ཐེངས་གཅིག་སྔོན་མོ་རྫོང་ནས་བོ་དོང་དུ་ཕེབས་དུས་ཁྱི་གུ་ཆུང་ཆུང་ཡིད་དུ་འོང་བ་ཞིག་སྐུ་ཕག་ནས་བཏོན་ནས་དབོན་རིན་པོ་ཆེ་འདི་ན་གསུང་གནང་བ་དེ་ལ་ཐུགས་ཀྱང་ཤིན་ཏུ་མཉེས་བར་གྱུར་ཅིང་རྒན་དུ་མ་སོང་བར་ལ་སྐུ་འཁྲིས་རང་དུ་སྡོད་པའི་སྤྱོད་པ་ཡང་གཞན་ལས་ལེགས་ངེས་སྐུ་རྩེད་ཀྱི་རིགས་ཞུ། ཞལ་ངོ་རྣམས་གནས་གསར་ནས་བོ་དོང་དུ་ཕེབས་པའི་ཚེ་ཞམ་འབྲིང་པ་ཚོས་མ་ཤེས་པར་ཁྱི་དེ་སྔོན་མགྱོགས་བཞིན་གཅིག་པུར་འགྲོ། ཕར་ཕེབས་སྐབས་ཀྱང་དེ་དང་འདྲ། མིང་བདུད་མོ་གཡུལ་རྒྱལ་མ་ཟེར་ཞིང་རྗེས་སུ་གསོབ་བྱས་ནས་སྤྱན་གཟིགས་སུ་ཡོད་པ་སྔོན་གྲུབ་ཆེན་ཀུ་ཀུ་རི་པར་འཁྲུངས་པའི་བརྡ་ཆོས་ལས་ཁྱི་དཀྱུས་མ་ནི་མ་ཡིན་ནོ། །རོག་ཚོར་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གིས་བཀའ་བརྒྱད་གསང་རྫོགས་ཀྱི་སྒྲུབ་ཆེན་གནང་དུས་རྗེ་འདི་དགུང་ལོ་བཅུ་གཅིག་འགྲོ་བས་མཆོད་གར་གྱི་གར་དཔོན་མཛད་པས་ཀུན་ཡ་མཚན་དུ་རྩི། བོ་དོང་དུ་ཇོ་ཞལ་གཉིས་ཀའི་དུས་འཁོར་གྱི་དབང་བཀའ་འཇམ་དབྱངས་མཁྱེན་བརྩེའི་ཞབས་