[A:༤༠༤]ཞི་དྲག་གཉིས་པོ་འདི་ཚེ་རབས་སྔོན་མ་ནས་ལས་ཀྱི་འབྲེལ་པ་ཡོད་པའི་ཆོས་སྐྱོང་ཞིག་ཡིན་འདྲ་བས་ཤིན་ཏུ་འགོ་ཞིང་རྗེས་གནང་བྱེད་རེས་ཀྱང་འཚུབ་ལྷོངས་ཀྱི་རྣམ་པ་རེ་ངེས་པར་ཡོང་བའི་དམ་དོག་ཆེ་ཙམ་དགོས་པ་འདུག་ཅེས་རྗེ་བཀའ་འགྱུར་བ་སོགས་ལ་གསུང་བ་ནི་འཁྲུལ་ཞིག་རིན་པོ་ཆེས་ཞ་ལུའི་གདན་ས་མཛད་དུས་ཆོས་སྐྱོང་འདི་ཉིད་ལ་གཙོ་བོར་མཛད་པའི་ཤུགས་ཡིན་པ་འདྲ། རྩོད་དུས་པདྨའི་རྒྱལ་ཚབ་གཏེར་ཆེན་ཆོས་ཀྱི་རྒྱལ་པོ་རིག་འཛིན་མངའ་རིས་པ་ཆེན་པོ་ཉི་ཟླ་འོད་ཟེར་ལ་དཔལ་ཨྱོན་ཆེན་པོས་དངོས་སུ་གནང་བའི་འཆི་མེད་གྲུབ་པའི་རླུང་སྦྱོར་གྱི་གདམས་པ་ཟབ་མོ་འདི་ཉིད་དགུང་ལོ་བཅུ་དྲུག་བཞེས་པ་ཤིང་ཕོ་ཁྱིའི་ལོ་ཡབ་ནམ་མཁའ་ཕུན་ཚོགས་དང་ལྷན་ཅིག་པར་བྱ་རྒོད་གཤོངས་སུ་རིག་འཛིན་རྗེ་ལ་གསན་པས། ཇི་སྐད་དུ། ཨེ་མ། གསང་ཆེན་བསྟན་པའི་མངའ་བདག་རིག་འཛིན་རྗེས། །གསང་ལས་ཡང་གསང་ཉིང་ཁུའི་གདམས་པ་འདི། །གསང་སྔགས་འཆང་བ་ནམ་མཁའི་མིང་ཅན་ལ། །གསང་ཞིང་སྦས་པའི་དབྱིངས་ནས་གནང་བ་ཡིན། །ཞེས་ཆེད་དུ་བརྗོད་པའང་མཛད། གཞན་ཡང་སྔ་ཕྱིར་བཀའ་བརྒྱད་བདེ་འདུས་རིག་འཛིན་ཡོངས་འདུས་དང་དྲག་པོ་དབུ་དགུ་སོགས་རྙིང་མ་བཀའ་གཏེར་གྱི་དབང་ལུང་མན་ངག་གི་གསན་པ་ཆེར་གནང༌། མཁན་ཆེན་སྡིངས་མ་པ་བསླབ་གསུམ་རྒྱལ་མཚན་གྱི་དྲུང་དུ་གསུང་ངག་རིན་པོ་ཆེ་སློབ་བཤད་ཀྱི་དབང་ཁྲིད་ལུང་བྱིན་རླབས་དང་བཅས་པ་གསན་པའི་རྒྱུ་དབང་གི་དུས་མཁན་ཆེན་རིན་པོ་ཆེའི་གཟིགས་སྣང་ལ། རྗེ་ཉིད་བཞུགས་པའི་མདུན་གྱི་ནམ་མཁའ་ཚར་ཆེན་ཆོས་ཀྱི་རྒྱལ་པོ། །ཐམས་ཅད་མཁྱེན་པ་