[A:༤༡༨]ནུ་བློ་གྲོས་མཇལ་བར་གསང་ཆེན་སློབ་བཤད་ཀྱི་སྔགས་གྲ་ཡར་ཀླུངས་བཀྲ་ཤིས་ཆོས་སྡེར་ཕེབས། མཇལ་ཙམ་ནས་དཔོན་སློབ་སྔར་ནས་འདྲིས་པ་ལྟ་བུའི་ཐུགས་དགྱེས་ཤིང་གསུང་གླེང་འཕེལ་བར་མཛད། མཁན་རིན་པོ་ཆེར་ཚར་ཆེན་གྱིས་མཛད་པའི་ཀྱེ་རྡོར་མཎྜལ་སྒྲུབ་མཆོད་དང་རྗེ་ཉིད་ཀྱིས་མཛད་པའི་ཞལ་གྱི་གཏོར་སྐྱོང་གི་ལུང༌། ཚེ་དབང་གྲུབ་རྒྱལ་མའི་དབང༌། ཕྱག་དྲུག་པའི་རྗེས་གནང་སོགས་ཆོས་འབྲེལ་ཁ་ཡར་གསན། ཁྱེད་ཀྱིས་ཆོས་སྡེའི་གྲ་པ་རྣམས་ལ་གུར་ཞལ་པུ་ཏྲ་བེག་ཙེ་རྣམས་ཀྱི་རྗེས་གནང་མཛོད་གསུང་བ་ལྟར་བཀའ་བཞིན་བསྒྲུབས། ཧོར་ཟླ་ལྔ་པའི་ཉེར་གཅིག་ཐམས་ཅད་མཁྱེན་པའི་སྐུ་མཆོད་དུས་དྲན་ལ་དཔོན་སློབ་བཅུ་གཉིས་ཀྱིས་དཔལ་རྡོ་རྗེ་འཇིགས་བྱེད་རྭ་ལུགས་རྡུལ་ཚོན་གྱི་དཀྱིལ་འཁོར་བཞེངས་ནས་ཞག་བརྒྱད་ཀྱི་བར་བདག་འཇུག་ཚར་བརྒྱད་བཞེས་པའི་ཉེར་གཉིས་ཀྱི་དགོངས་འཚམས་ཆོས་སྡེའི་ཐད་ཀྱི་ནམ་མཁའ་ལི་ཁྲི་ལྟར་གྱི་དབུས་ན་འཇའ་ཁ་དོག་ལྔ་ལྡན་གྱི་གུར་ཁྱིམ་དང་གཞན་ཡང་ལྔ་ལྡན་བརྐྱང་པ་སོགས་བུན་ལོང་ངེ་བས་ཁེངས་པ་དཔོན་སློབ་ཐམས་ཅད་ཀྱིས་གཟིགས་ཤིང་སྒྲུབ་མཆོད་ཚུགས་གདོང་གི་ཚེས་བཅུ་དགུའི་ནུབ་ངོ་མཚར་བའི་མནལ་ལམ་ཞིག་བྱུང་གསུང་བ་ལས་འདི་ཡིན་གསལ་བར་མ་གསུང་སྣང་ཡང་ཕྱི་རོལ་ཏུ་ཤར་བ་དང་ནང་དུ་ཡེ་ཤེས་ཀྱིས་གཟིགས་ངོར་བྱུང་བ་མཐའ་དག་བླ་མ་འཇམ་དཔལ་རྡོ་རྗེ་གང་ཐུགས་དག་པའི་ངོ་བོར་རོ་གཅིག་པའི་རང་ཞལ་མངོན་སུམ་གཟིགས་པའི་རྣམ་འཕྲུལ་ལོ། །ཧོར་ཟླ་བདུན་པ་སྤྲེའུ་ཟླ་བའི་ཚེས་བཅུའི་མཆོད་པ་བྱང་གཏེར་ཐུགས་སྒྲུབ་དྲག་པོ་རྩལ་གྱི་སྒོ་ནས་གནང་བའི་དུས་ཐུགས་དང་བའི་སྣང་བ་དང་དད་གདུང་