[A:༤༢༠]ཞིང་ཨྱོན་ཆེན་པོའི་ལུང་གིས་ཟིན་པ་ཡིན་ཞེས་རྗེ་བླ་མ་ལྷག་པར་ཐུགས་གཙིགས་ཆེ་བ་ཡིན་འདུག །དེ་ནས་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་དང་རྣལ་འབྱོར་དབང་ཕྱུག་ཡར་ཀླུངས་པ་སེང་གེ་རྒྱལ་མཚན་ཁུ་དབོན་རྣམས་ཀྱིས་བྱིན་གྱིས་བརླབས་ཤིང་དམ་ཅན་སྲུང་མ་སྤྲིན་བཞིན་དུ་འདུ་བའི་རྩེས་དང་བསམ་གླིང་བདེ་བ་ཆེན་པོར་ཕེབས། དཔལ་ལྡན་བླ་མ་དམ་པའི་སྐུ་བརྙན་ཚུལ་ཁྲིམས་མ་དང་ནང་རྟེན་སོགས་ལ་སྨོན་ལམ་དང་དབང་བཞི་བཞེས་པ། མགོན་པོ་ཆེ་ཆུང་ལས་མགོན་བཅས་པར་མཆོད་གཏོར་བསྐང་བཤགས་འཕྲིན་འཆོལ་མཛད། གོང་མ་སྡེ་སྲིད་ཕག་མོ་གྲུབ་པ་དྲུང་ཆེན་ཏཱའི་སི་ཏུས་ཕྱག་དར་བའི་ཆོས་གྲ་ཆེན་པོ་དཔལ་གྱི་རྩེས་དང་དུ་ཕེབས་ཏེ་པཎྜི་ཏ་ཆོས་ཀྱི་གྲགས་པའི་ཐུགས་དམ་རྟེན་ཐུབ་པ་གསེར་གླིང་མར་གྲགས་པ་མཉམ་མེད་ཇོ་བོ་ཆེན་པོས་གདན་དྲངས་ནས་དགེ་བཤེས་ཁུ་སྟོན་པའི་རྟེན་སྐལ་དུ་བྱུང་བ་དེས་གཙོས་ཕྱི་ནང་རྣམས་ཞིབ་མཇལ་མཛད་དེ་རིམ་གྱིས་ཆུ་བོ་ཆེན་པོ་པཀྵུའི་ཀླུང་བརྒལ་བའི་ལྷ་སྲས་ཁྲི་སྲོང་ལྡེའུ་བཙན་གྱིས་ཨོ་ཏནྟ་པཱུ་རིའི་གཙུག་ལག་ཁང་ལ་དཔེ་བྱས་ཏེ་བཞེངས་པའི་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོའི་དབུ་རྩེ་རིགས་གསུམ། གླིང་བཞི་གླིང་ཕྲན། ཇོ་མོའི་གླིང་གསུམ་སོགས་རྟེན་བརྟེན་པ་ཐམས་ཅད་ལ་ཕྱག་མཆོད་བསྟན་པ་རྒྱས་པའི་སྨོན་ལམ་གྱིས་མཚམས་སྦྱོར་གནང༌། ཐང་ཡིག་ལས། ཁྱད་པར་ཡར་ཀླུངས་ཤེལ་བྲག་མཆིམས་ཕུ་གཉིས༔ རྒྱ་གར་དུར་ཁྲོད་བསིལ་བ་ཚལ་དང་མཚུངས༔ ཞེས་ཆེས་ཆེར་བསྔགས་པའི་གསུང་གི་དབེན་གནས་བསམ་ཡས་མཆིམས་ཕུར་