[A:༤༥༡]པོ་ཆེ་འཇལ་བར་ཕེབས་པའི་དབང་འཁྲིད་ལུང་མན་ངག་རྒྱ་ཆེར་གནང་ཞིང་རྣམ་རྒྱལ་སྟག་རྩེར་སྡེ་པ་ཡུམ་སྲས་ལ་འདོད་ཆོས་མང་དུ་སྩལ། ནུབ་ཅིག་འོད་གསལ་ལ་ཚར་ཆེན་ཆོས་ཀྱི་རྒྱལ་པོ་ཞལ་ཁྱིམ་དང་ན་བཟའ་ཇི་ལྟ་བ་གཟི་བརྗིད་དང་ལྡན་པའི་ཞབས་གཉིས་རྗེ་ཉིད་ཀྱི་དབུ་གཙུག་ཏུ་བཞག་ཅིང་ཕྱག་གཉིས་ཀྱིས་ཞལ་འགྲམ་སྐྱོར་ནས་བཀའ་བསྒོ་རྒྱས་པ་ཞིག་གནང་བར་ཐུགས་གདུང་ཤུགས་མོས་གུས་དྲག་པོས་གསོལ་འདེབས་མཛད་པའི་མུས་ནས་ཚར་ཆེན་རིན་པོ་ཆེ་འདི་ཨྱོན་རིན་པོ་ཆེ་དང་དངོས་སུ་མཇལ་བའི་བྱིན་རླབས་ནུས་མཐུ་ཁྱད་པར་དུ་འཕགས་པ་ཡིན་སྙམ་པར་ཚར་ཆེན་ཨྱོན་རིན་པོ་ཆེར་ལམ་གྱིས་སོང་བའི་ཐུགས་ཀའི་ཐད་དུ་ཐུགས་ཡིད་རྩེ་གཅིག་ཏུ་བསྟད་དེ་རྣམ་པ་ཨྱོན་ལས་ངོ་བོ་རིན་པོ་ཆེ་ཚར་པ་རང་ཡིན་སྙམ་པའི་ངང་ནས་མནལ་སད་དུས་ཀྱང་ཞབས་དབུ་གཙུག་ཏུ་བཞག་པའི་དྲོད་དེ་ག་ཚ་ཆིལ་ལེ་བར་དངོས་སུ་བྱུང་ཞིང་ཐུགས་སེམས་བདེ་འབོལ་ལེ་བར་གྱུར། ཡང་མནལ་ལམ་ཞིག་ལ་སྔགས་འཆང་ཆེན་པོ་བསོད་ནམས་ཆོས་འཕེལ་དང་རྗེ་ཉིད་ཀྱི་ཐུགས་སྦྱར་བ་ལྟ་བུས་བཀའ་བསྒོ་ཞིང་བྱིན་གྱིས་བརླབས་པའི་ངང་སད་པའི་ཐུགས་བདེ་བའི་ཚད་ཅིག་བྱུང༌། དེ་ནས་མི་རིང་བར་ཚར་ཆེན་རྡོ་རྗེ་འཆང་གི་ཡབ་གཞིས་རྨུ་གཤོང་དགེ་བའི་ཚལ་གྱི་མགོན་ཁང་དུ་ཚར་ཆེན་གྱི་ཕྱག་ནས་མའི་གནོད་སྦྱིན་བེག་རྩེའི་སྐུ་མཇལ། སྙན་དར་དམོད་ནས་གཏོར་བསྔོ་འཕྲིན་བཅོལ་རྒྱས་པར་གནང་སྟེ་ཕྱིར་ཕེབས་གདོང་གདུང་མཚམས་ལ་སྤྱན་གཟིགས་ཀྱི་མདའ་དར་མང་པོ་ཡོད་པའི་ཁྲོད་ནས་དར་སྐུད་དམར་པོ་འདོམ་བཅུ་ཙམ་ཞིག་ཕྱི་སྐས་འགོའི་བར་བརྐྱང་བའི་གདན་འདྲེན་ཚུལ་མཛད་