[A:༤༥༢]པ་ནི་ཆོས་སྐྱོང་འདི་ཉིད་ལ་མངའ་བརྙེས་པས་པད་མཚོར་ངང་པ་ལྟར་དམ་ཅན་རང་བཞིན་གྱིས་འདུ་བར་བསམ། དེ་ནས་མཉན་ཡོད་བྱ་རྒོད་གཤོང་དུ་འཇམ་དབྱངས་དགའ་བའི་བཤེས་གཉེན་གྱིས་སྤྱན་དྲངས་སྙན་བརྒྱུད་ཀྱི་ཆོས་དུ་མ་སྩལ། འོད་གསལ་དུ་རྫ་ཐོག་འོག་གི་ཤོད་ལ་འགྲོ་རྩིས་བྱས་པར་སྐོར་ལམ་དུ་བནྡེ་ཆས་བཟང་སྣུམ་བག་དང་ལྡན་པས་ཕྱག་བགྱིས་བྱུང་བའི་ངག་ནས་དངུལ་ཆུ་ན་བློ་གསལ་རྒྱ་མཚོའི་གཏེར་ཡོད་དོ་ཟེར་བཞིན་པའི་ངང་རྗེས་འབྲངས་ཏེ་ཇོ་བོའི་སྐུ་མདུན་གྱི་ཐད་དུ་ངའི་མིང་ལ་གནོད་སྦྱིན་རྡོ་རྗེ་གྲགས་ཞེས་འཛུམ་འཛུམ་ངོ་ཤེས་གང་ཡང་ཞུ་བ་ཞིག་རྨིས་གསུང་བ་རྗེ་བྱམས་ཕྲུག་པར་སྙན་བརྒྱུད་ཀྱི་ཆོས་སྐོར་རྣམས་གནང་དགོས་པ་དང་རྒྱལ་ཆེན་རྣམ་ཐོས་སྲས་དགྱེས་པའི་མཚན་མ་ཡིན་ནམ་སྙམ། འཇམ་དབྱངས་དགའ་བའི་བཤེས་གཉེན་ལ་སྔ་ཕྱིར་སྙན་བརྒྱུད་ཀྱི་ཆོས་བཀའ་གནང་བའི་ཆོས་སྐྱོང་ཆེ་ཆུང་གི་སྐོར་མཛད་སྐབས་མན་ངག་ཤིན་ཏུ་ཟབ་པ་རྣམས་མི་གནང་བའི་རྩིས་ཀྱིས་ཟུར་དུ་བཏོན་ནས་བླ་བྲེའི་སྟེང་དུ་འཇོག་པ་གནང་བ་ཐག་པ་ཆད་ནས་ཕྱག་དཔེ་རྣམས་བྱམས་ཕྲུག་པའི་སྐུ་པང་དུ་བབས་པ་ནི་ཆོས་སྐྱོང་གིས་ཆོས་དངོས་སུ་གཏད་པ་ལྟ་བུའི་དཔོན་སློབ་གཉིས་ཀའི་ཆེ་བར་མངོན། བོ་དོང་དུ་ཐེགས་པའི་དཔལ་ལྡན་དམག་ཟོར་མར་བཀང་གསོ་མཆོད་བསྟོད་རྒྱས་པར་མཛད། གཟིམས་དཔོན་པདྨའི་ཁང་གཡབས་སུ་བཞུགས་པའི་ནུབ་དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་ཡོངས་རྫོགས་ཀྱི་སྐུ་གསལ་བ། ས་སྐྱ་པ་ཆེན་པོའི་སྐུ་ལས་འོད་སྔོན་པོ་འཕྲོ་བའི་ནང་དུ་དགྱེས་མཛད་རྡོ་རྗེ་ལྷ་དགུའི་རྟེན་བརྟེན་པ་གསལ་བར་གཟིགས། འདི་སྐབས་ཡུམ་བསྙུང་ཡུན་རིང་བའི་དབང་བསྐུར་བྱིན་