[A:༤༥༣]རླབས། སྨན་དཔྱད། སྐུ་རིམ་གང་རྒྱས་མཛད་ཀྱང་སྐུ་ཚེས་མ་ཟིན་པར་དགོངས་རྫོགས་རྒྱ་ཆེར་གནང་ཞིང་བདུན་ཚིགས་ཤིག་ལ་ཐུགས་རྗེ་ཆེན་པོའི་དབང་རྒྱས་པར་མཛད་པའི་ནུབ་མནལ་ལམ་དུ་སྐུ་གདུང་སྟེང་གི་ནམ་མཁར་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གི་སྐུ་དབྱིབས་སྔར་ཇི་ལྟ་བ་ལ་པཎ་ཞྭ་བཞེས་པ་ཞིག་གསལ་བར་བྱུང་བ་རྗེས་སུ་འཛིན་པའི་བརྡ་ཡིན་ནམ་སྙམ། ཞུགས་འབུལ་གྲུབ་ནས་ཞག་ཁ་ཤས་སོང་བ་ན་ཀུན་མཁྱེན་མཁྱེན་བརྩེ་ཁྱེལ་བཞུགས་མཛད་ནས་ཞབས་པུས་གཡས་པའི་སྟེང་ན་མཎྜལ་བསྣམས་ཏེ་འབུལ་ཚུལ་གྱི། ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ་ནས། །འགྲོ་ཀུན་རྣམ་དག་ཞིང་དུ་སྐྱེ་བར་ཤོག །ཅེས་གསུང་པའི་སྐུའི་འཁྲིས་ན་ཡུམ་དེ་ཞལ་ཁྱིམ་དམར་ཆམ་མེ་བ་ལ་དབུ་སྐྲ་སིལ་བུ་སྐུ་རྐེད་ཡན་ཆད་ཁེབས་པའི་མཐར་དེ་འདྲ་བ་ངོ་མི་ཤེས་པ་འདྲ་དང་བཅས་རྗེ་ཉིད་ལ་སྐོར་བ་བྱེད་པ་དྲིན་ལན་ཡིན་རྒྱུ་བར་བྱུང་བ་ཡུམ་ཀུ་ལུ་ཏའི་ཞིང་དུ་མཁའ་འགྲོར་གྱུར་པའི་ལྟས་སུ་མཁྱེན། འདི་དུས་བཀྲ་ཤིས་རྩེའི་སྡེ་པ་ཆོས་རྗེ་གྲོངས་པའི་ཡར་འདྲེན་ལ་ཕེབས་དགོས་ཚུལ་གྱི་གདན་འདྲེན་བྱུང་བར་ཡུམ་སྐུ་ཁམས་བདེ་ཞན་གྱི་དབྱེ་བ་མ་ཕྱེད་པར་དགོངས་ཁྲོལ་དགོས་ཚུལ་གནང་བར་སྡེ་པས་གལ་སྲིད་མི་ཕེབས་པ་འདུག་ན་ཨྱོན་མཚོ་མོ་ལྟ་བུ་གཞན་ཞིག་གདན་དྲོངས་ཞེས་མངགས་ཚོད་ནས་བསམ་སྡིངས་སྤྲུལ་སྐུ་བྱོན་པ་མཆོད་ཡོན་འབྲེལ་ཟབ་ཀྱིས་གྲུབ་མཐའ་འགྱུར་བའི་འགོ་ཚུགས། ལྕགས་ཁྱི་ལོ་དཔོན་རིན་པོ་ཆེ་བསོད་ནམས་རབ་བརྟན་ཞ་ལུར་དགེ་ཚུལ་སྒྲུབ་པར་ཕེབས་པའི་སྔ་ནུབ་ལྷ་ཆེན་རྩིས་ཀྱི་མགོན་པོའི་ལས་མཁན་སྲོག་གི་བདག་པོ་གོས་དཀར་གྱི་ཙེ་བར་དང་དེ་སྟེང་དུ་ཁྲབ་གསོལ་