[A:༤༥༦]ཤིག་པར་ངན་བསླབས་མཛད་པའི་འཕུང་བཤིག་སྦྱོར་ངན་ཡིན་འདྲ་ཟེར་བ་གང་ལྟར་ནའང་སྣེའུ་སྡོང་རྩེ་ནས་དབུ་མཛད་ལྷ་བྱ་ཡར་རྒྱབ་འཕྱོང་རྒྱས་འབོག་མདོང་སོགས་སྡེ་དཔོན་རགས་བསྡུས་ཐུགས་རྩེ་གཅིག་པའི་བདེ་གཟར་ལངས་པར་བཀྲ་ཤིས་རྩེ་བ་དཔོན་གཡོག་ཡར་སྟོད་ཀྱི་དམག་ཕྱི་འབྲངས་ཟིན་རྗེས་སྡེ་པ་དངོས་གྲུབ་རྡོ་རྗེ་གློ་བུར་དུ་ང་དགེ་སློང་རྒན་པོ་ལྕགས་ཀྱི་ཆོས་གོས་གྱོན་པ་ཡིན་ཞེས་རྗོད་ནས་ཆས་ཏེ་མར་ལམ་ཆོས་སྡེར་བྱོན་པ་རྡོ་རྗེ་འཆང་གིས་སྐུ་ན་དང་སྐུ་རྟེན་གང་ས་ནས་འབྱོན་པ་མི་འགབ་གལ་ཏེ་ཕེབས་ན་གསོལ་གོ་མ་མཆོད་གསུངས་པར་དངོས་ལན་མེད་པའི་རྡོ་རྗེ་ཕག་མོ་མཁྱེན་ཞེས་གཡས་ཆུང་གི་རྣམ་པ་མཛད། དམག་རྟ་བཟང་ཤོས་རྣམས་སོང་ཟིན་པའི་གསར་མ་ཤིན་ཏུ་རྒན་པ་ཞིག་ལ་རྟ་གོ་སྤྲད་སྡེ་པ་རང་གསོལ་གོ་བཟབས་སྤྲོད་དང་བཅས་ཆོས་སྡེའི་འགག་ཏུ་རྟ་ལ་ཆིབས་པ་དང་ལྷན་ཏུ་བླ་མ་ལྐུགས་པ་དམག་ལ་འགྲོ་བར་གོ་ཆ་མ་གྱོན་ཞེས་ཆིག་ལབ་དང་བཅས་བྱོན་པར་སྨོན་མཁར་རི་ཟུར་དུ་གཡུལ་བུབ་སྐབས་གོ་ཆ་མེད་ན་བྲོས་པས་ཐར་རྒྱུར་རྟས་གོ་ཆ་མ་ཐེག་པའི་ཡུར་པོར་འགྱེལ་ཐོག་རྒྱ་རི་བའི་དམག་གིས་དེད་ནས་དབུ་ཤོར་བ་ནི་བར་དེར་གྲུབ་མཐའ་བོ་དོང་པར་འགྱུར་ནས་འཕྱོས་མདར་དགོན་པ་བཏབ་པ་སོགས་ལ་བརྟེན་རིག་འཛིན་ཡོངས་འདུས་ཀྱི་སྤྱི་ལུང་གསང་བའི་གལ་མདོ་ལས། གླང་རིའི་མདུན་ངོས་གདུག་པའི་རི་གསུམ་ལ༔ ལྕགས་ལྷ་རིགས་གསུམ་བཞེང་ཞིང་མནན་གཟིར་འབད༔ ཆོས་ཀྱི་གྲ་འབྱུང་དམ་ཚིག་མ་གཙང་ན༔ ཕོ་བདུད་ཐུགས་འཁྲུགས་ཉེར་གཅིག་གྲི་རུ་འཆི༔ ཞེས་བཀྲ་ཤིས་ཆོས་སྡེའི་རྒྱབ་རི་ལ་སྦལ་སྡིག་སོགས་སྲོག་ཆགས་མ་རུངས་པའི་དབྱིབས་ཅན་གྱི་