[A:༤༥༧]རི་སྤོག་གསུམ་ཡོད་འདུག་པ་དང་པོ་བདུད་ཀྱི་གཙོ་བོ་ལེགས་ལྡན་གུར་གྱི་མགོན་པོ་ཡིན་པས་མགོན་པོའི་བཀའ་ཆད་བྱུང་བར་གླེང༌། གཙང་དཔུང་ཡང་གཡས་རུ་བྱང་ཕྱོགས་ཀྱི་བདེ་གཟར་རྩ་བ་མ་ཆོད་པས་འགོར་གཞི་ཆེ་ཞིང་དྲུང་པ་རྒྱལ་ཚབ་པས་བཤོལ་བ་མ་གཏོགས་ཡར་སྟོད་སྡེ་པ་ཁྲི་བས་ལྷུན་པོ་སྒང་བསྒྱུར་ནས་དག་པོར་འབྲོས་རྩིས་མཛད་པ་སོགས་སྐུ་རབ་པ་ཕྱོགས་གཏོགས་དམིགས་པ་མེད་པའི་དབྱིངས་སུ་རྒྱས་འདེབས་པར་ཉེ་བའི་གྲུལ་དྲག་པའི་སྐབས་སྡེ་པ་མ་ཆེན་གྲོངས་པ་ཙམ་ལས་བཀྲ་ཤིས་རྩེའི་སྡེ་དགོན་དབྱིངས་ལ་འཕོ་འགྱུར་སོགས་ཉེས་སྐྱོན་ཆེར་མི་འབྱུང་བ་དམ་པ་འདིའི་གཟི་བྱིན་དང་ཐུགས་རྗེ་ཁོ་ནའོ། །ལོ་སྔ་རྟིང་ཚོར་འབྲུམ་ནག་མཆེད་དྲགས་པའི་ཁྱབ་བདག་སྨན་ལུང་པ་བློ་མཆོག་རྡོ་རྗེ་སྐུ་འབྲུམ་མ་ཐར་བར་རྗེ་འདི་ཉིད་ཀྱིས་སྲུང་བ་དང་བྱིན་རླབས་གནང་ཞིང་ཨོ་ལོ་རང་སྐྱོན་མི་ཡོང་ཞེས་ཞལ་གྱིས་བཞེས། དེ་རྗེས་ཚེར་མ་ཅན་གྱི་ནད་ཁ་ཡར་བྱུང་བ་ཡང་ཐུགས་འཛེམ་ཆེར་མ་ཐུབ་ཅིང༌། ལྷག་པར་མེ་བྱི་ལོ་ཤེལ་བྲག་ཏུ་འབྲུམ་ཡོལ་མཛད་དུས་སྲེའུ་སྡོང་རྩེ་ནས་ལོ་གསར་འཕྲོས་གཏམ་ལ་འཕྲལ་དུ་གདན་འདྲེན་གྱི་སྐུ་དབང་བེད་སྤྱོད་ལྟ་བུ་བྱུང་སྐབས་ཕེབས་ལམ་དུ་ཐོར་བས་ཤི་བའི་ཕུང་པོ་དང་འཛོམ་པས་ཐུགས་ཡ་ང་བ་བྱུང་བར་ཕྱིས་སུ་ཁོ་བོ་ཚེར་མ་ཅན་གྱི་ནད་མ་འགོས་པའི་ངང་དུ་སོང་བ་བླ་མ་དམ་པ་དེ་ཉིད་ཀྱི་བྱིན་རླབས་ཞུགས་པའི་བཀའ་དྲིན་ཡིན་ཡང་ཡང་གསུང༌། ཆོས་ཀྱི་རྒྱལ་པོ་དཔལ་བཀྲ་ཤིས་སྟོབས་རྒྱལ་གྱི་ཐུགས་སྲས་རིག་འཛིན་ངག་གི་དབང་པོ་ཞེས་སྣ་ནམ་རྡོ་རྗེ་བདུད་འཇོམས་ཀྱི་སྤྲུལ་པའི་ཟློས་གར་དེ་ཉིད་རྒྱལ་ཁམས་ཕྱོགས་མེད་ཀྱི་གདུལ་བྱའི་རེ་བ་