[A:༣༩༤]ལ་གསོལ་བ་འདེབས། །ཧེ་རུ་ཀཿདཔལ་དགྱེས་པའི་གར་མཛད་ཀྱང༌། །ཚུལ་ཁྲིམས་རྒྱན་གྱིས་མཛེས་པའི་དགེ་སློང་མ། །མཁའ་འགྲོའི་གཙོ་མོ་ཤཱི་ལ་བྷ་དྲའི་ཞབས། །འབྲེལ་ཚད་དོན་ལྡན་ཁྱོད་ལ་གསོལ་བ་འདེབས། །སྔོན་གྱི་ལེགས་བྱས་དགེ་བའི་འབྲས་བུ་ལས། །བླ་མ་ལྷ་དང་སྲུང་མས་རྗེས་བཟུང་ནས། །འཇམ་མགོན་མཁྱེན་བརྩེའི་འཕྲིན་ལས་སྐྱོང་བའི་དཔལ། །དབང་ཕྱུག་རབ་བརྟན་ཞབས་ལ་གསོལ་བ་འདེབས། །ཞེས་པ་ལྟར་འཕགས་པའི་ཡུལ་དུ་གྲུབ་ཐོབ་བརྒྱད་ཅུ་རྩ་བཞིའི་ནང་ཚན་རྣལ་འབྱོར་དབང་ཕྱུག་ཀུ་ཀུ་རི་པ། རྒྱལ་དབང་པདྨ་ཐོད་འཕྲེང་གངས་རིའི་ལྗོངས་འདིར་ཕེབས་པའི་ཚེ་ཉེ་བར་གནས་པའི་དགེ་སློང༌། དཔྱལ་སྟོན་ཆེན་པོ་ཀུན་མཁྱེན་ཤེས་རབ་རྒྱལ་མཚན། ཨྱོན་ཆེན་པོའི་ལུང་གིས་ཟིན་ཅིང་དཔལ་ཞ་ལུ་གསེར་བཀང་གི་ཁྲི་ཐོག་ཏུ་བྱོན་པའི་འཁྲུལ་ཞིག་ཚུལ་ཁྲིམས་རྒྱལ་མཚན། ཡེ་ཤེས་མཁའ་འགྲོའི་གཙོ་མོ་རྒྱལ་ཡུམ་ཚུལ་ཁྲིམས་བཟང་མོ་སོགས་བསྟན་འགྲོའི་མགོན་དང་གླིང་དུ་གྱུར་པ་རིམ་པར་བྱོན་པའི་ཡང་སྲིད་དུ་རྗེ་བླ་མ་དམ་པ་འདི་ཉིད་ཕེབས་ཚུལ་ནི། མ་ཕམ་པས། རིགས་དང་རུས་དང་ཆོ་འབྲང་དང༌། །ཞེས་ཆོ་རིགས་ཁུངས་བཙུན་པ་གསུངས་པ་དང་ཕྱོགས་མཚུངས་པར་འོ་སྐོལ་གྱི་སྟོན་པ་བུ་རམ་ཤིང་པས་གཟིགས་པ་རྣམ་པ་ལྔའི་ནང་གསེས་རིགས་ཕུན་སུམ་ཚོགས་པ་རྒྱལ་རིགས་ལ་དགོངས་ནས་འཕགས་པའི་ཡུལ་གྱི་སའི་དབང་ཕྱུག་འགྲན་ཟླ་དང་བྲལ་བ་ཟས་གཙང་མའི་སྲས་སུ་བལྟམས་པའི་སྔོན་བྱུང་གི་རྣམ་ཐར་དང་རྗེས་འཇུག་གི་ཉམས་ལེན་འདྲ་བར། སྤྱིར་རི་ཁ་བ་ཅན་གྱི་འགྲོ་བ་རྣམས་རྒྱ་གར་གྱི་རྒྱལ་པོ་རཱུ་པ་ཏི་དཔུང་བཅས་གཡུལ་ཕམ་སྟེ་བུད་མེད་ཀྱི་