[A:༣༩༣]བརྟན་བསྟན་པའི་རྒྱལ་མཚན་དཔལ་བཟང་པོའི་རྣམ་པར་ཐར་པ་མདོ་ཙམ་བརྗོད་པ་ལ། མངོན་རྟོགས་རྒྱན་ལས། སེམས་ཅན་ཀུན་ཡིད་ཤེས་པ་དང༌། །མངོན་པར་ཤེས་པས་བརྩེ་བ་དང༌། །སངས་རྒྱས་ཞིང་བཟང་སྒྲུབ་པ་དང༌། །ཡོངས་སུ་བརྟག་ཕྱིར་སངས་རྒྱས་བསྟེན། །དབང་པོ་ཤེས་དང་རྒྱལ་བ་ཡི། །ཞིང་སྦྱོང་སྒྱུ་མ་ལྟར་གནས་དང༌། །བསམས་བཞིན་སྲིད་པ་ལེན་པ་དང༌། །ལས་ནི་རྣམ་པ་འདི་བརྒྱད་བཤད། །ཅེས་པ་ལྟར་འཕགས་ཆེན་དམ་པ་རྣམས་ནི་བསམས་བཞིན་སྲིད་པར་སྐྱེ་བ་བླངས་ནས་འགྲོ་བའི་དོན་ལ་མེ་ཏོག་གི་ཚལ་དུ་བུང་བ་དང་ངང་པ་དངས་པའི་རྫིང་བུར་འཇུག་པ་དང་མཚུངས་པར་ངན་སོང་གི་གནས་ཀྱང་མཐོ་རིས་ཀྱི་དགའ་ཚལ་ལྟར་སྤྲོ་བ་ལྷུར་ལེན་པར་མཛད་པས་རི་དྭགས་དང་འདབ་ཆག་སོགས་སྐྱེ་བ་སྣ་ཚོགས་སུ་སྤྲུལ་པའི་མཐའ་བརྗོད་པར་ག་ལ་ནུས་ནའང་བསྟན་པའི་གསལ་བྱེད་ཀྱི་སྒྲོན་མེ་སྦར་བར་ནུས་པའི་སྐྱེས་བུ་མཆོག་གི་ཚུལ་འགའ་ཞིག་བརྗོད་ན། རྗེ་ཉིད་ཀྱི་གསུང་ལས། རྒྱལ་བའི་མཁྱེན་བརྩེ་གཅིག་བསྡུས་འཇམ་པའི་དབྱངས། དབང་ཕྱུག་བརྒྱད་ལྡན་རྡོ་རྗེ་འཛིན་པའི་སྐུ། །སྐུ་དྲིན་མཉམ་མེད་རྩ་བརྒྱུད་བླ་མ་ཡིས། །ལུང་བསྟན་རྗེས་སུ་བཟུང་ལ་གསོལ་བ་འདེབས། །སྔོན་ཚེ་འཕགས་ཡུལ་གྲུབ་དབང་ཀུ་ཀུ་རི། །ཁ་བའི་ལྗོངས་འདིར་རྒྱལ་བ་ཀུན་གྱི་དངོས། །ཨྱོན་དྲུང་ན་འཁོར་གྱི་དགེ་སློང་གིས། །བསྟན་དང་འགྲོ་ཀུན་སྐྱོང་ལ་གསོལ་བ་འདེབས། །དེ་ལྟར་ལེགས་བྱས་སྐྱེ་བ་དུ་མའི་མཐར། །དཔྱལ་སྟོན་ཀུན་མཁྱེན་ཤེས་རབ་རྒྱལ་མཚན་དཔལ། །པདྨས་ལུང་བསྟན་འཁྲུལ་ཞིག་རིན་པོ་ཆེ། །ཚུལ་ཁྲིམས་རྒྱལ་མཚན་ཞབས་