[A:༤༧༧]གནང་ཞིང་ཁྲོལ། དེ་ནས་ལོ་ཁ་ཤས་ཀྱི་བར་ངོར་ཤར་པའང་གདན་སར་མ་འཁོད་པས་མཁན་མེད་དུ་ལུས་སྣང༌། ཁྱབ་བདག་ཞ་ལུ་པ་ཆེན་པོ་རི་ཕུག་དབུ་མཛད་ཐོག་ནས་ལྕགས་ལུག་གྲང་མོ་ཆེར་མཇལ་བར་ཕེབས་པས་རྡོ་རྗེ་འཆང་གི་བཀའ་ལས། བླ་བྲང་ཚོམ་ཆེན་དུ་ཁྱབ་བདག་ཞ་ལུ་པར་ད་ནི་རིན་པོ་ཆེ་རང་རི་ཕུག་གི་གྲ་བ་ཁ་ཡ་ཀོག་པོ་མ་གི་ཚོའི་དཀྱིལ་དུ་མ་བཞུགས་པར་འདིར་ཐུགས་དམ་མཛད་ན་གསུངས་པ་ལ་སྡེ་སྲིད་ནས་དགོངས་པ་ཡང་མི་ཡོང་བ་འདུག་བདག་གིས་བོར་ན་བརླག་འགྲོ་བ་འདྲ་ཞུས་པས་ད་འོ་ན་བསྐྱར་བཀོད་ཅིག་བྱས་ཡུན་རིང་པོ་མཛད་དགོས་པ་ཡིན་ནམ་གནང་བ་འདི་དུས་རི་ཕུག་དབུ་མཛད་གནང་ནས་ལོ་གསུམ་གྱི་སྐབས་ཡིན་ཅིང་མེ་བྱི་གྲ་ངན་ཅི་རིགས་ཀྱི་མི་བསྲུན་པའི་སྒྱུ་འཕྲུལ་གྱིས་སེ་རག་སྒྲུབ་སྡེ་དང་ཁང་དམར་ནས་སོགས་སྐུ་ཉེ་ཚོའི་སར་ལོ་གཅིག་ཙམ་བཞུགས་དགོས་བྱུང་བ་གླང་ལོའི་མཇུག་ཏུ་སྡེ་སྲིད་གཙང་པས་དབུ་མཛད་བསྐྱར་བསྐོ་གནང་སྟེ་སྔ་རྟིང་གཉིས་དྲིལ་བར་ལོ་སུམ་ཅུ་རྩ་གསུམ་སོང་བས་ལྐོག་གྱུར་གྱི་ཆོས་རྗེན་པར་གསལ་བ་དེ་ལས་ཡིད་ཆེས་ཀྱི་གནས་གང་དུ་མཆིས། དེ་དང་མཚུངས་པར་རྗེ་ཞ་ལུ་པ་སོགས་དཔོན་སློབ་ཐུགས་ནང་གཙང་ས་ཚོར་སྡེ་སྲིད་གཙང་པའི་མཚན་དོན་ཀྱང་ཡུན་རིང་མི་ཡོང་བའི་རྒྱུ་མཚན་གསལ་པོ་ཡང་ཡང་གསུང་བས་མཚོན། ཡིད་ཆེས་ཀྱི་ངེས་པ་རྙེད་པ་མང་དུ་ཡོད་པར་གདའ། དམ་པ་འདི་ཉིད་ཀྱིས་དགེ་བའི་བཤེས་གཉེན་བསྟེན་ཚུལ་མདོ་ཙམ་སྨོས་ཟིན་ཅིང་དེར་མ་འདུས་པ་ནི། ས་སྐྱ་ཁྲི་ཆེན་འཇམ་དབྱངས་བསོད་ནམས་དབང་པོ། །ཁྲི་ཆེན་ངག་དབང་ཀུན་དགའ་བསོད་