[A:༣༩༦]ཀུན་དགའ་བློ་གྲོས་སོགས་ལྕམ་སྲིང་བརྒྱད་འཁྲུངས་པའི་ནང་སོ་སྐུ་མཆེད་ཀྱི་ཁབ་ཏུ་ལྷ་ཁང་ཆེན་མོ་བའི་སྲས་མོ་དཔལ་འཛོམ་བྱོན་པར་སྲས་ནམ་མཁའ་རྡོ་རྗེ་ཚེ་བརྟན་དཔལ་འབྱོར་བཟང་པོ་འཁྲུངས་ཏེ་ཡུམ་སྔ་མོ་ནས་གྲོངས་པའི་ཚོང་འདུས་མགུར་མོ་བའི་སྲས་མོ་བྱང་སེམས་བུ་ཁྲིད་བླངས་པར་གཅུང་ནམ་མཁའ་རྒྱལ་བ་བྱོན་པའི་ཇོ་མོར་སེ་སྟོན་རིག་སྔགས་འཆང་བའི་གདུང་བརྒྱུད་འདར་ཆོས་རྫོང་པ་དོན་ཡོད་རྣམ་རྒྱལ་གྱི་སྲས་མོ་ཚེ་བརྟན་བུ་ཁྲིད་བཞེས་པར་སྲས་ཞབས་དྲུང་བརྟན་པའི་དྲུང་ངམ་བསོད་ནམས་རབ་བརྟན། ཆོས་ཀྱི་རྒྱལ་མཚན། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །ནོར་བུ་བཟང་པོ་བཞི་འཁྲུངས་པ་ལས་གཅེན་ཞབས་དྲུང་བརྟན་པའི་དྲུང་ལ་འདར་ཆོས་རྫོང་པའི་སྲས་མོ་ནམ་མཁའི་དྲུང་བསུས་པར་སྲས་མ་བྱུང་བ་སླར་ཚེ་དབང་དྲུང་བླངས་པར་སྲས་འ་ཞ་ནམ་མཁའ་ཕུན་ཚོགས་བྱུང་བར་ཇོ་མོ་ཤངས་བརྒྱ་ཚོ་བའི་ལྕམ་བསོད་ནམས་འབོལ་ལེ་བཞེས་པར་སྲས་བཞི་བྱུང་བ་དེ་དག་ཀྱང་ལུགས་གཉིས་ཀྱི་མཛད་པ་རྣམས་འཇིག་རྟེན་ཕལ་པའི་ངང་ཚུལ་ལས་འདས་པའི་ངོ་ཚ་ཁྲེལ་གཞུང་གི་བག་ཡོད་ཅིང་སྐྱེས་རྒྱལ་རྣམས་དཔའ་བརྟུལ་དང་བུད་མེད་རྣམས་མཛངས་མའི་རང་བཞིན་ཅན་དཀོན་མཆོག་གསུམ་ལ་བླ་མར་བཟུང་ནས་མཆོད་པ་དང་མ་ནུས་པ་བྱམས་པས་སྐྱོང་ཞིང་སྤྲོས་བཅས་དང་སྤྲོས་མེད་ཀྱི་ཐུགས་དམ་ལ་བརྩོན་པ་ལྷུར་མཛད་པ་ཤ་སྟག་བྱོན་པའི་ཕྱི་འཕྱར་དེ་ལྟར་གྲགས་ཀྱང་དོན་ཐམས་ཅད་མཁྱེན་པའི་གཅེན་འགྲན་ཟླ་དང་བྲལ་བ་ཞབས་དྲུང་བརྟན་པའི་དྲུང་གི་སྲས་སུ་ངོས་འཛིན་ལ། དེའང་ཆུ་ཤེལ་ཀྱི་བུ་མོ་ལང་ཚོ་ངོམ་པའི་ས་འཛིན་གྱི་འཕྲེང་བས་ཡོངས་སུ་བསྐོར་བའི་ལྗོངས་འདིར་རུ་བཞིར་གྲགས་པ་ལས་གཡས་