[A:༤༧༩]ཏན་ལ་བསྔགས་པ་དང་དད་གུས་གཙོ་བོར་བཏོན་པའི་ཤུགས་ལ་སྐྱོན་ཀྱང་ཡོན་ཏན་དུ་འཆར་བའི་སྣང་ཚུལ་དཔག་པར་དཀའ་ལ། རྟག་བརྟན་སྤྲུལ་སྐུ་གཙང་ཤེད་ཀྱིས་སྟོད་ཕྱོགས་སུ་ཕལ་ཆེར་བསྟུན་ཕྱོགས་དགོས་པ་ཞིག་ཡོད་སྣང་བས་བཀྲ་ཤིས་རྩེ་དང་གསེར་མདོག་ཅན་ཚོར་ཆོས་བཀའ་འདྲ་གསན་ཟེར་བའང་སྟེས་དབང་ཙམ་ལས་གསན་མ་གསན་ལ་མ་ལྟོས་པའི་ཐུགས་རབ་ལ་བེད་སྤྱད་ནས་གནང་བ་དང༌། སྒྲུབ་མཆོད་ཀྱང་ཚུལ་ལྡན་མེད་པར་གྲགས་ཆེ་གཤིས་ཐུགས་འདུན་མེད་ན་ཐོབ་པར་ཡང་མི་འགྲོ་འདུག་པས་གསན་ཐོར་མེད་པ་དང་བཅས་ཆོས་ཀྱི་གྲངས་སུ་བརྩི་ཡིན་མེད་པ་འདྲ་སྙམ་པ་ལོག་རྟོག་ཏུ་ཤར་མོད། ངེས་དོན་དུ་ཇི་ལྟར་ཡིན་མ་ངེས་སོ། །མགོན་པོ་འདི་ཉིད་ལ་ཆོས་ཀྱི་འབྲེལ་པ་ཐོབ་པ་སོགས་སློབ་མ་ནི་ས་ཆེན་པོའི་རྡུལ་བཞིན་བགྲང་པར་དཀའ་ནའང་ཟབ་ཆོས་ཀྱི་མཆོད་སྤྲིན་མཉམ་མེད་དགོན་གསར་བར་ཡང་དབུལ་ཞིང༌། རགས་པ་ཙམ་སྨོས་ན་རྗེ་བཙུན་ས་སྐྱ་པ་ཆེན་པོ་ངག་དབང་ཀུན་དགའ་བསོད་ནམས། པདྨའི་གདུང་འཚོབ་བྱང་པ་རིགས་འཛིན་ངག་གི་དབང་པོ། །རྩེ་ཚོགས་མཁན་ཆེན་པདྨ་བསོད་ནམས། མཁས་གྲུབ་ཆེན་པོ་བོད་མཁར་པའི་ཐུགས་སྲས་སྤྱན་སྔ་རིན་པོ་ཆེ་མི་ཕམ་ཆོས་ཀྱི་རྒྱ་མཚོ། གནས་ལྔ་རིག་པའི་པཎྜི་ཏ་ཆེན་པོ་མཁན་ཆེན་ངག་དབང་ཆོས་གྲགས། ཤེས་བྱའི་གནས་ཀུན་ལ་མཁྱེན་རབ་ཀྱི་དབང་ཕྱུག་འཇམ་དབྱངས་དགའ་བའི་བཤེས་གཉེན། སྤྱན་སྔ་ཚུལ་ཁྲིམས་འབར་གྱི་དབོན་རིགས་རྒྱུད་སྡེ་རྒྱ་མཚོའི་མངའ་བདག་ལོ་པ་སྤྱན་སྔ་ཀུན་དགའ་དོན་གྲུབ། གསར་རྙིང་གི་ཆོས་ཚུལ་རྒྱ་མཚོ་ལྟ་བུར་མཁྱེན་པའི་སྤྱན་སྔ་པ་ཀླུ་