[A:474]bag dang ldan pa'i dbu gtsug na rje btsun brtse ba chen po sku mdog mi sha kha na bza' bzhugs stangs sogs bris thang khungs btsun las byung ba ji lta ba zhig gsal bar gzigs/ zhabs drung bdag chen rin po cher/ gur mgon lha brgyad ma/ lha bcu gnyis ma/ 'khor rkyang dang zhal sgrub dus dang bcas pa'i rjes gnang / bram ze'i mngag gtad/ chos skyong gnyis ka'i man ngag gi yig sna'i skor du ma'i lung dang phyag khrid/ dkar bdud/ dur khrod bdag po yab yum gyi man ngag skor sogs kyi lung / snyan brgyud ha la nag po'i be'u bum ma bu'i skor rdzogs par phul bas dpon slob thugs yid gcig 'dres lta bur gyur pa'i rgyu mtshan/ bdag chen rin po ches gnang ba'i mgon po'i chos 'byung las/ sngon chos rgyal 'phags pas dam pa kun dga' grags la chos skyong gi man ngag thun mong ma yin pa rnams gnang ba'i tshe 'di rnams nged kyi tsha bo rnams la 'phrod par gyis gsungs pa bzhin dam pas kyang bla ma bdag nyid chen po kho na la gnang 'dug pa dang / dus phyis bdag chen rdo rje 'chang gis kyang rje rdo ring pa la de dang 'dra ba'i bka' stsal phebs 'dug kyang bar skabs kyi zhal ngo phal cher la 'di skor gyi man ngag yongs rdzogs bzhugs pa zhig ma byung 'dug mod khyed rang skal ba dang ldan pa dang brtson 'grus 'dzom pas gur zhal gtso bor gyur pa'i sa skya pa'i bstan srung dbang po rnams kyi chos skor zab mo mtha' dag lus pa med par bum pa gang byo'i tshul du thob pa ni bla ma gong ma rnams kyi thugs rje dang / mkha' 'gro chos skyong rnams kyis 'phrin las bsgrubs pa'i dge mtshan