[A:༥༩༩]ཝཾ་ཆོས་ལྡན་གཙོ་བོར་གྱུར་པའི་ས་ལུགས་དང༌། གཞན་ཡང་གྲུབ་མཐའ་རིས་མེད་རགས་བསྡུས་དབུས་གཙང་གི་སྡེ་དགོན་མང་དག་ལ་མང་ཇ་བསྔོ་རྟེན་རྒྱ་ཆེར་སྤེལ། རྗེ་རྡོ་རྗེ་འཆང་ཞི་བའི་དབྱིངས་སུ་གཞོལ་བར་ཉེ་ཚེ་སྐུ་ཅུང་ཟད་ཧྲེབ་པའི་ཚུལ་བསྟན་པར་ཉིན་མཚན་ཀུན་ཏུ་སྐྱོ་ངལ་མེད་པར་གནང་བས་ཐུགས་དམ་ཆག་མེད་རྣམས་ལ་ཐང་ལྷོད་ཅི་རིགས་བྱུང་བར་བརྟེན་མེ་གླང་དབུས་སུ་ཕེབས་ཞོར་ངོར་ཨེ་ཝཾ་ཆོས་ལྡན་དུ་མཁན་ཆེན་ཐར་པ་རྩེ་བ་ནམ་མཁའ་སངས་རྒྱས་ལ་ལམ་དུས་སོགས་ཆག་མེད་གསོ་བ་མཛད། རིམ་གྱིས་ཡར་ཀླུངས་བཀྲ་ཤིས་ཆོས་སྡེར་ཕེབས་ནས་རྩེ་ཚོགས། རྩེས་དང་ས་དགེ །དཀོན་གཉེར་ཕྱི་ནང༌། རི་བོ་ཆོས་གླིང༌། བཀྲ་ཤིས་ཆོས་སྡེ། ལམ་རིམ། བཀྲ་ཤིས་བདེ་ཆེན། རས་ཆུང་ཕུག་སོགས་ཀྱི་སེར་ཚོགས་གྲལ་དབུར་ཐུབ་བསྟན་རྡོ་རྗེ་བྲག་ནས་དུས་གསུམ་སངས་རྒྱས་དཔལ་ཨོ་རྒྱན་ཆེན་པོའི་རྒྱལ་ཚབ་བྱང་པ་ངག་དབང་རིགས་འཛིན་རྡོ་རྗེ་ཆོས་རྒྱལ་བསྟན་པའི་རྒྱལ་མཚན་དཔལ་བཟང་པོ་སྤྱན་དྲངས་འབུལ་འགྱེད་མང་ཇ་ཚ་ར་ལ་བརྟེན་པའི་རྙེད་བཀུར་ཡང་དག་བསྒྲུབས། རིགས་འཛིན་ངག་གི་དབང་པོའི་དྲུང་དུ་རྡོ་རྗེ་དྲག་པོ་རྩལ་གྱི་བྱིན་རླབས་ཐུགས་དབང༌། ལྕགས་སྡོང་མ་དང་ཚེ་གུར་སྦྲགས་མ། ཉང་གི་དྲག་པོ་མེའི་སྤུ་གྲི་རྣམས་ཀྱི་དབང༌། རིགས་འཛིན་ཆེན་པོའི་འཁོར་བ་དབྱིངས་སྒྲོལ་གྱི་ཆོས་སྐོར། གུ་རུ་ཡོན་ཏན་གཏེར་མཛོད་ཀྱི་དབང་ལུང༌། སྔགས་སྡེབས་སྙིང་གཟེར་ནག་པོ་དང་གཏེར་སྟོན་བརྒྱ་རྩའི་གསོལ་འདེབས་ཀྱི་ལུང༌། གྲུ་གུ་ཡང་ཝཾ་གི་འཇོམས་བྱེད་ཉི་ཟླ་ནག་པོའི་ཆོས་སྐོར། པདྨ་གླིང་པའི་གུར་ཕུར་ཞབས་ཅན་དང་རཀྴའི་ཞལ་