[A:༦༠༠]གཟི་ལྡན་དབང་ཕྱུག་གི་སྒྲུབ་ཐབས། གདོང་བཞི་པའི་བསྙེན་སྒྲུབ་ལས་གསུམ་གྱི་ལུང་སོགས་སྔ་ཕྱིར་དམ་པའི་ཆོས་ཀྱི་བཀའ་དྲིན་མང་དུ་གསན་པར་གནང༌། དགོངས་པ་རིན་པོ་ཆེ་ཆོས་ཀྱི་དབྱིངས་སུ་རྫོགས་པ་དང་ཕྱི་རབས་གདུལ་བྱ་རྣམས་ཀྱི་ལེགས་བྱས་རྒྱ་མཚོའི་ཞིང་གི་ཆེད་དུ་ཨེ་ནས་སྤྲུལ་སྐུ་མཁས་པ་ཆོས་འཕེལ་ཅན་ལྔ་བཀུག་སྟེ་བཟོ་གྲ་བཙུགས་ཤིང་རྡོ་རྗེ་འཆང་གི་སྐུ་ཚབ་མགུལ་པ་ཡན་རྗེ་བླ་མ་དམ་པས་ཕྱག་བཟོ་གནང་བས་ཞལ་ཁྱིམ་མངོན་སུམ་ལྟ་བུ་མཐོང་ཐོས་དྲན་དང་རེག་པས་རྣམ་པར་གྲོལ་བའི་བྱིན་རླབས་ཀྱི་གཟི་བྱིན་འོད་དུ་འབར་བ་གཙོ་བོར་བཞུགས་པའི་མཐའ་སྐོར་དུ་སངས་རྒྱས་རྡོ་རྗེ་འཆང༌། རྡོ་རྗེ་བདག་མེད་མ། གྲུབ་ཆེན་བི་རཱུ་པ། བརྩེ་ཆེན་སྙིང་པོའི་ཞབས། སློབ་དཔོན་རིན་པོ་ཆེ། རྗེ་བཙུན་རིན་པོ་ཆེ། ཆོས་རྗེ་པཎྜི་ཏ། ཆོས་ཀྱི་རྒྱལ་པོ་འཕགས་པ། ཚོགས་སྒོམ་རིན་པོ་ཆེ། ཉན་ཆེན་བསོད་ནམས་བརྟན་པ། རྒྱལ་བ་བྲག་ཕུག་པ། དཔལ་ལྡན་བླ་མ་དམ་པ། ཆོས་རྗེ་དཔལ་ལྡན་ཚུལ་ཁྲིམས། གྲུབ་ཆེན་བུདྡྷ་ཤྲཱི། ངོར་ཆེན་རྡོ་རྗེ་འཆང༌། མུས་ཆེན་འཁོར་ལོ་སྡོམ་པ། བདག་ཆེན་རྡོ་རྗེ་འཆང༌། རྗེ་བཙུན་ཁའུ་པ་ཆེན་པོ། ཚར་ཆེན་ཆོས་ཀྱི་རྒྱལ་པོ། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །མཚུངས་མེད་གཞོན་ནུ་བློ་གྲོས། མཁན་ཆེན་བསླབ་གསུམ་རྒྱལ་མཚན་བར་གྱི་ལམ་ཟབ་བརྒྱུད་པའི་སྣང་བརྙན་གྱི་ཞལ་ཁྱིམ་བཟོ་བོས་དཔེ་མ་ལོན་པ་མི་འཕྱུགས་པའི་ཁྱད་ནས་ཕྱག་སོར་གྱིས་བསྐྲུན་པ་དང་བཅས་པར་གནས་ཆེན་དུ་མའི་ས་སྣ་རྡོ་སྣ། དམ་རྫས་ཁྱད་པར་ཅན། སྨན་སྣ། དར་སྣ་སོགས་བསྲེས་པའི་སྐུ་རྒྱུ་ལ་བྱད་དབྱིབས་བགྲེས་གཞོན་བཞུགས་སྟངས་ན་བཟའ་ཁ་དོག་རྣམས་དཔེ་ཁུངས་བཙུན་དང་གསུང་རྒྱུན་ལས་བྱུང་བ་ལྟར་ལ་དེ་བཞིན་གཤེགས་པའི་འཕེལ་གདུང་གིས་གཙོས་ཡུངས་འབྲུ་ལྟ་བུའི་རིང་བསྲེལ། བླ་མ་གོང་མ་དེ་དག་གིས་མཚོན་པའི་དམ་པ་དུ་མའི་སྐུ་བལ་དང་སྐུ་གདུང་གི་རིང་བསྲེལ། རྒྱུད་སྡེ་རྣམ་བཞིའི་གཟུངས་ཆོས་སྐུའི་རིང་བསྲེལ་གནོད་སྦྱིན་འཁོར་ལོ་སོགས་གཟུངས་བཞུགས་ཀྱི་རིམ་པ་རྟེན་བཞེངས་སོ་བྱས་སོ་པའི་འཇིག་རྟེན་ཆོས་བརྒྱད་ལྷུར་ལེན་པ་དང་མི་འདྲ་བར་དམ་པའི་ཕྱག་བཞེས་འཁྲུལ་པ་མེད་པར་ཐུགས་རུ་ཤིན་ཏུ་ང་བ་རྣམས་ཀྱི་བཞུགས་ཁྲི་ན་བཟའ། མདུན་ལྕོག །ཅང་ཏེ། རྡོར་དྲིལ། ནང་མཆོད་ཀ་པཱ་ལ། བུམ་པ། ཞལ་དཀར། སྤྱི་བླུགས། བཟེད་ཞལ་སོགས་རུང་མཐུན་མཁོ་བའི་ཡོ་བྱད་རྣམས་སླ་ཆོས་སུ་མ་སོང་བའི་ལེགས་པར་བསྒྲིག་པ་གནང་སྟེ་བཀྲ་ཤིས་ཆོས་ཀྱི་འདུས་གྲ་ཆེན་པོར་ལམ་ཟབ་བླ་མ་ལྷ་ཁང་ངོ་མཚར་བ་གྲུབ་པར་གཉིས་སུ་མེད་པ་དཔལ་དགྱེས་མཛད་རྡོ་རྗེ་མན་ངག་ལུགས་ལྷ་དགུའི་དཀྱིལ་འཁོར་དང་རྗེས་སུ་འབྲེལ་བའི་རབ་གནས་ཉིན་གསུམ་མའི་སྒོ་ནས་འོག་མིན་ཞིང་ཁམས་རྒྱ་མཚོ་ནས་ཡེ་ཤེས་པ་གངྒཱའི་ཀླུང་གིས་བགྲང་བར་མི་ནུས་པ་སྤྱན་དྲངས་ཏེ་དམ་ཚིག་པ་དང་རོ་གཅིག་ཏུ་བརླབས་པ་དེའི་ཚེ་འཆི་མེད་ཀྱི་ལམ་ཀུན་གུར་གྱི་དབྱིབས་ལྟ་བུའི་འཇའ་རིས་སྣ་ལྔ་བཀྲག་ཏུ་འཚེར་ཞིང་གསོལ་གདབ་སེམས་བསྐྱེད་ཀྱི་དུས་མེ་ཏོག་གི་ཆར་བབས་པ་ཐམས་ཅད་ཀྱི་མངོན་སུམ་པའི་སྤྱོད་ཡུལ་དུ་གྱུར། བཟོ་བོ་རྣམས་ཀྱང་ཡོན་གྱིས་ཚིམ་པ་སོགས་ལྷ་མཆོད་མི་མཆོད་རྒྱས་པར་མཛད། ས་སྟག་ཧོར་ཟླ་བཅུ་གཅིག་པའི་དམར་ཆེན་གཏོར་བཟློག་གི་རྡོ་རྗེ་སློབ་དཔོན་དུ་ཕེབས་སྐབས་དགེ་སློང་ཡེ་ཤེས་བློ་གྲོས་ཀྱི་མཐོང་སྣང་ལ། གསོལ་ལྕོག་གི་ཁར་སྐྲ་ལོ་དང་ཀོང་རྣ་བཏགས་པའི་མགོ་ཞིག་མི་ནག་པོ་ཞིག་གིས་ཁྱེར་ནས་བཞག་སོང་བ་རིང་པོར་མ་ལོན་པར་སྡེ་བའི་ནང་ཟན་ཆོས་སྡེར་ཤིན་ཏུ་བརྣག་པ། ཁྱབ་འཇུག་གཟའི་གདོང་ཐུག་གིས་སྐད་ཅིག་ལ་འཇིག་རྟེན་ཕ་རོལ་ཏུ་སོང་བའི་མི་ནག་པོ་དེ་ནི་འཆི་བདག་གཤིན་རྗེའི་རྒྱལ་པོ་པུ་ཏྲ་ནག་པོར་ངེས་སོ། །དྭགས་པོ་ཕྱོགས་སུ་བཀག་པོའི་ཟི་བུན་ལ་བརྟེན་པའི་འཁྲུག་ཟིང་ཆེར་སོང་བ་གྲ་དོལ་ཡར་ཀླུངས་ལྷོ་བྱང་གི་དམག་དཔོན་བཀྲས་སྒང་ནས་ཀྱིས་བྱས་ནས་ཕྱིན་སྐབས་སྡེ་པ་བཀྲ་ཤིས་རྩེ་པའི་སྐུ་རིམ་དུ་འཇམ་དཔལ་གཤིན་རྗེ་དམར་པོ་རླུང་སྒྲུབ་ཀྱི་དགྲ་མནན་གྱི་ལས་སྦྱོར་བཞིས་ཀར་གནང་བའི་ཚེ་གཏོར་མ་ལས་ཁྲག་རྒྱུན་མང་དུ་འཛགས་པས་ལྕགས་སླང་ཁེངས་ཤིང་མཆོད་དཔོན་འཇམ་དབྱངས་རྒྱལ་མཚན་གྱི་རྨི་ལམ་དུ་ས་དོང་རིང་པོར་སྲོག་ཆགས་མང་པོ་འཇུག་པ་དང་འགྲོ་བ་རྨིས་ཚུལ་ཞུས་པ་ན་ལས་སྦྱོར་འདི་རིགས་ལ་རྨི་ལྟས་དེ་བཞིན་འོང་གསུང༌།