ཅེས་གསུངས་པ་ལྟར་འགྱུར་བའི་གོ་སྐབས་ག་ལ་སྲིད་ཀྱང༌། རྗེ་བཙུན་གྲོལ་མཆོག་གིས། དམ་ཆོས་ཀུན་གདུལ་བྱའི་བློ་བྲིད་ལས། །ཕྱོགས་འཛིན་གྱི་གྲུབ་མཐའ་སྐྱོང་མ་མྱོང༌། །ཆོས་དུ་མ་རོ་གཅིག་གི་རྣལ་འབྱོར་པ། །གྲུབ་མཐའ་རྐང་མ་ཚུགས་ཟེར་ཀྱང་འགྱོད་རྒྱུ་མེད། །ཅེས་པ་བཞིན་བདག་ཅག་གི་སྟོན་པས་ཀྱང་ལ་ལར་གང་ཟག་གི་བདག་ཡོད་པར་བསྟན་པ་སོགས་གདུལ་བྱ་རྗེས་སུ་འཛིན་པ་ལ་ཐབས་སྣ་ཚོགས་ཤིག་དགོས་པས་རིས་མེད་པའི་ཆོས་ལུགས་ལ་གསན་བསམ་འཆད་ཉན་མཛད་པའང་གདུལ་བྱ་རྗེས་སུ་འཛིན་པར་དགོངས་ཤིང་ཁྱད་པར། ཀུན་མཁྱེན་མཁྱེན་བརྩེའི་གསུང་མགུར་ལས། ངས་སྦྱངས་པ་དེ་ས་སྐྱ་པའི་གཞུང་ལུགས་ལ་སྦྱངས་ཀྱང༌། །མཁས་པ་དེ་གསང་སྔགས་རྙིང་མ་ལ་མཁས་པ། །འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། །ཨ་ཧོ་ངོ་མཚར་དུ་ཆེ་བྱུང༌། །ངས་བསྒོམས་པ་དེ་གསུང་ངག་ལམ་འབྲས་བསྒོམས་ཀྱང༌། །རྟོགས་པ་དེ་རྫོགས་པ་ཆེན་པོ་ལ་ཤར་བ། །འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། །ཨ་ཧོ་ངོ་མཚར་དུ་ཆེ་བྱུང༌། །ངས་གསོལ་བ་དེ་རྣལ་འབྱོར་དབང་ཕྱུག་ལ་བཏབ་ཀྱང༌། །བྱིན་རླབས་དེ་ཨྱོན་པདྨ་ཁོས་གནང་བ། །འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། །ཨ་ཧོ་ངོ་མཚར་དུ་ཆེ་བྱུང༌། །ངས་བཤད་པ་དེ་དམ་ཆོས་ཕྱོགས་མེད་ཅིག་བཤད་ཀྱང༌། །འགྲོ་ཕན་དེ་གསང་སྔགས་རྙིང་མ་ལ་བྱུང་བ། །འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། །ཨ་ཧོ་ངོ་མཚར་དུ་ཆེ་བྱུང༌། །ཞེས་གསུངས་པ་བློ་ཆུང་ཅི་རིགས་ཀྱི་ཁོང་བར་མི་ཤོང་ཡང་འཁོན་ཀླུ་དབང་སྲུངས་ནས་དཀོན་ཅོག་རྒྱལ་པོ་ཡན་ལ་རྙིང་མ་བཀའ་མའི་སྔགས་འཆང་ཤ་སྟག་ཏུ་བྱོན་ཞིང༌། དེ་ནས་ཀྱང་ཡི་དམ་ཡང་ཕུར་དང་ཆོས་སྐྱོང་དཀར་བདུད་ལ་མཛད་ལ། མཉམ་མེད་བསམ་གཏན་གླིང་པའི་ཨ་ཏི་ཡང་ཕུར་གྱི་རྫོགས་རིམ་ཁྱད་པར་ཅན་དང་རྗེ་བཙུན་རྡོ་རིང་པ་ཆེན་པོའི་སྐུ་ཐོག་ཏུའང་རྙིང་མ་བའི་སྔགས་འཆང་འཇའ་ལུས་གྲུབ་པ་གཉིས་ཙམ་བྱུང་ཚུལ་བླ་ཆེན་རུ་ཐོག་པ་ནམ་མཁའ་གཟི་བརྗིད་ཀྱིས་གསུངས་པ་ལྟར་ཚར་ཆེན་ཡབ་སྲས་བཀའ་གཏེར་ཆོས་ཀྱི་གནད་མཁྱེན་པའི་ཐུགས་གཙིགས་ཆེ་ཙམ་གནང་བའི་རྒྱུན་བཞིན་རྗེ་བླ་མ་འདི་ཉིད་ཀྱིས་ཀྱང་ཀླུ་སྒྲུབ་རྗེར་གསན་པ་ཙམ་དུ་མ་ཟད་ཉང་ཏིང་འཛིན་བཟང་པོ་དང་མངའ་བདག་ཉི་མ་འོད་ཟེར་སོགས་གྲུབ་བརྙེས་ཉང་རིགས་སྟོད་སྨད་མང་པོར་གྱེས་པའི་ཉང་སྟོན་སྨན་ལུང་པ་མི་བསྐྱོད་རྡོ་རྗེའི་གདུང་རིགས་ལས་སོན་ཅིང་བླ་མ་མངའ་བདག་གི་བྱང་ལས་ཀྱི་མཁའ་འགྲོའི་བཀའ་བབས་གཉོས་ཞིག་ཆེན་པོ་ནས་རིམ་བརྒྱུད་ཁྲ་ཚང་པའི་སྣག་དཔོན་རྗེ་ཁྱབ་བདག་བློ་མཆོག་རིག་པའི་རྡོ་རྗེ་ཞེས་པཎ་ཆེན་བི་མཱ་ལ་མི་ཏྲའི་སྤྲུལ་པར་ལུང་གིས་ཟིན་པ་དེ་ལ་གཏེར་ཁ་འོག་མ་བླ་མ་ཡོངས་རྫོགས་ཀྱི་དབང་ལུང༌། བཀའ་བརྒྱད་གསང་བ་ཡོངས་རྫོགས་ཀྱི་ཆོས་སྐོར། རྟ་མགྲིན་དབུ་དགུ་ཕྱག་བཅོ་བརྒྱད་པའི་སྒྲུབ་སྐོར། རྟ་མགྲིན་ནག་པོ་ལྕགས་རལ་ཅན་གྱི་དབང་ལུང༌། འཆར་ཀ་གནམ་སྐས་མའི་སྒྲུབ་སྐོར། ཐུགས་སྒྲུབ་དྲེགས་པ་ཚར་གཅོད་དུ་གྲགས་པའི་དྲག་དམར་གྱི་དབང་ལུང༌། ཕྱག་རྡོར་གཏུམ་པོའི་སེང་གེ་སྒྲ་སྒྲོག་གི་དབང་ལུང༌། དྲེགས་པ་དབུ་དགུའི་སྲོག་དབང་ལུང་བཅས། ཛམ་བྷ་ལ་དམར་པོའི་ཆོས་སྐོར། གྲ་པའི་འཛམ་དམར་གྱི་སྒྲུབ་སྐོར། དུང་ཚོ་རས་པའི་རྫོགས་ཆེན་ཡང་ཏི་ནག་པོ་གསེར་གྱི་འབྲུ་གཅིག་མའི་དབང་ལུང་ཁྲིད་བཅས། རཏྣ་གླིང་པའི་ཐུགས་སྒྲུབ་ཡང་སྙིང་འདུས་པའི་དབང་ལུང༌། གུ་རུ་དྲག་པོའི་དབང་ཆེ་འབྲིང་ཆུང་གསུམ་སྒྲུབ་སྐོར་ལུང་བཅས། ཉང་གི་བླ་མ་དམར་འཁྲིད་ཀྱི་ཆོས་སྐོར། གཏེར་རྒྱུད་སྙིང་པོའི་དབང་ལུང༌། རྟ་མགྲིན་ནག་ཆུང་ལྷ་བརྒྱད་ཀྱི་དབང་ལུང༌། སྣང་རྩེ་བའི་རྟ་ནག་གི་དབང་ལུང༌། གདུགས་དཀར་ལྷ་བཅུ་བདུན་མའི་དབང༌། ཕ་དམ་པའི་འཇམ་དབྱངས་ཆོས་སྐོར། སྒྲོལ་མའི་མཚན་བརྒྱ་རྩ་བརྒྱད་དང་མཐུན་པའི་རྗེས་གནང༌། འཁྲུངས་རབས་སོ་བཞི་པའི་ལུང་སོགས་མང་དུ་གསན། ཆོས་དབང་རིན་པོ་ཆེའི་གདུང་འཛིན་ལྷ་བྲོ་སྤྲུལ་སྐུ་ཀརྨ་གུ་རུ་ཞེས་ལོ་ཆེན་བཻ་རོ་ཙ་ནའི་སྤྲུལ་པར་ལུང་གིས་ཟིན་ཅིང་བཀའ་གཏེར་ཆོས་ཀྱི་སྲོག་ཤིང་ཆེན་པོ་གང་དེའི་གདམས་པའི་བཀའ་བབས་སྒྲུབ་མཆོག་ཆོས་དབང་བསམ་གྲུབ་ཀྱི་གདམས་པས་ཐུགས་རྒྱུད་ཡོངས་སུ་གང་བའི་མཐུས་སྲིད་པའི་ཕུན་ཚོགས་མཐའ་དག་ཆུ་ཤིང་གི་འབྲས་བུ་དང་མེ་འོབས་ལྟ་བུར་གཟིགས་ནས་ཆོས་བརྒྱད་ཀྱི་བུན་ལོང་ཐམས་ཅད་རྒྱབ་ཏུ་བསྐྱུར་ཏེ་བས་མཐའི་དབེན་གནས་སུ་ལྷུན་གྲུབ་སྣང་བ་བཞི་ཁོར་ཡུག་ཏུ་འདའ་བའི་མཚུངས་མེད་ཆོས་དབང་ཀུན་བཟང་ལ་ཆོས་དབང་གི་བླ་མ་གསང་འདུས་ཀྱི་དབང་ལུང༌།