gsung pa glang dar gyi bstan pa bsnubs zhes pa'ang so thar la dgongs pas/ ji skad du/ ji ltar 'di ni shing rtsa'i gtso bo ste/ /rnam par 'phel dang kun 'dzin gnyis kyi rgyu/ /de bzhin dam chos tshogs rnams thams cad kyi/ /gzhi dang rtsa ba 'dul ba yin par gsungs/ /zhes thub pa sangs rgyas bcom ldan 'das kyi ring lugs 'jig rten gsum gyi sgron me yod med chos 'dul ba la rag las shing lhag tu dam pa 'di nyid tshul khrims mig gi 'bras bu ltar gces par 'dzin pas snga mo nas lung sde bzhi gsan bzhed yod pa ltar sna nam pa chen po rdo rje bdud 'joms dang srid gsum 'gran zla bral ba chos rje bla ma dam pa'i rnam 'phrul mthu stobs kyi dbang phyug kun dga' rnam rgyal gyi bsti gnas gong dkar rdo rje gdan gyi chos grwa chen po'i dpal 'byor gling du khu ston ngag dbang rnam rgyal la 'dul ba lung sde bzhi dang gzhan yang chos bka' ci rigs gsan cing snga phyi mang por nyi ma gling du mthu ston 'jigs med dpa' bo'i ring lugs 'dzin pa la 'gran zla med pa mkhas btsun grub pa'i dbang phyug chen po bla chen tshul khrims bkra shis par dus kyi 'khor lo'i sku gsung thugs yongs su rdzogs pa'i dbang gong dkar ba'i lugs kyi lam 'bras kyi 'khrid yongs rdzogs/ byin rlabs dang lung kha shas/ lam skor phyi ma'i lung / yi ge med pa dang mchod rten drung thob kyi byin rlabs/ yo ga khams gsum rnam rgyal/ dpal mchog rigs bsdus/ rdor dbyings phreng ba'i nang gi bdud rtsi gsum/ sa phur stod las gsum gyi dbang / smad las drag po sgrol ba'i rjes gnang paN chen kun bkras par bde chen ral gcig /rdo rje rtse mo rigs bsdus kyi dbang sogs zab chos rgya che bas thugs kyi bum bzang yongs su gang bar mdzad/ slar yang bkra shis chos sder phebs/ de'ang bstan pa spyi dang bye brag rje btsun sa skya pa'i bstan pa dang ston pa las gzhan du mi 'tshol ba'i thugs kyi dam bca' brtan po/ tshar chen chos kyi rgyal po'i lam yig tu/ rje btsun rdo ring pa chen po dang mjal nas gsung ngag rin po che thob pa man gzhan bla ma dang gdams ngag gang la'ang byang chub sgrub pa'i ched du mi smon zhing 'gram chu mi ldang ba'i nges shes gting tshugs pa zhig yod/ ces gsungs pa ltar 'gyur ba'i go skabs ga la srid kyang / rje btsun grol mchog gis/ dam chos kun gdul bya'i blo brid las/ /phyogs 'dzin gyi grub mtha' skyong ma myong / /chos du ma ro gcig gi rnal 'byor pa/ /grub mtha' rkang ma tshugs zer kyang 'gyod rgyu med/ /ces pa bzhin bdag cag gi ston pas kyang la lar gang zag gi bdag yod par bstan pa sogs gdul bya rjes su 'dzin pa la thabs sna tshogs shig dgos pas ris med pa'i chos lugs la gsan bsam 'chad nyan mdzad pa'ang gdul bya rjes su 'dzin par dgongs shing khyad par/ kun mkhyen mkhyen brtse'i gsung mgur las/ ngas sbyangs pa de sa skya pa'i gzhung lugs la sbyangs kyang / /mkhas pa de gsang sngags rnying ma la mkhas pa/ /'di ko sngon gyi las 'phro zhig yin nam/ /a ho ngo mtshar du che byung / /ngas bsgoms pa de gsung ngag lam 'bras bsgoms kyang / /rtogs pa de rdzogs pa chen po la shar ba/ /'di ko sngon gyi las 'phro zhig yin nam/ /a ho ngo mtshar du che byung / /ngas gsol ba de rnal 'byor dbang phyug la btab kyang