ཐམས་ཅད་མཁྱེན་པའི་གསུང་མགུར་དུ། སྡུག་མི་འདོད་ཅི་དང་ཅི་བྱུང་ཡང༌། །དེ་བྱུར་ངན་རང་གི་ཉེས་པ་ཡིན། །མི་གཞན་ལ་སྡུག་ཡུས་མི་འཚོང་བ། །ད་ཅི་ནུས་ཀུན་གྱི་སྡུག་བསྔལ་འཁུར། །སྐྱིད་བདེ་བ་ཅི་དང་ཅི་བྱུང་ཡང༌། །རྗེ་མཉམ་མེད་བླ་མའི་བཀའ་དྲིན་བསམ། །བདག་རང་གི་བསོད་ནམས་མི་བགྱིད་པར། །ད་འགྲོ་དྲུག་ཀུན་ལ་མཉམ་པར་འབུལ། །ཞེས་གསུངས་པ་ལྟར། སྐྱིད་ན་དཀོན་ཅོག་གི་ཐུགས་རྗེ་དང་སྡུག་ན་ལས་ངན་འཛད་པའི་ཆོས་ཐོག་ཏུ་འཇོག་བཞེད་ཁོ་ནས་ལྷ་བཙུན་བོ་དྷི་རཱ་ཛས། ཇོ་བོ་ཆེན་པོ་བསམ་ཡས་སུ་བཞུགས་པར་མ་འདོད་པའི་ཚེ། གང་ན་འཐབ་ཅིང་རྩོད་པ་བས། །དཔག་ཚད་བརྒྱ་ཡི་ཕ་རོལ་འགྲོ། །ཞེས་གཞན་དུ་ཕེབས་པའི་ལོ་རྒྱུས་དང་མཚུངས་པའི་འཕྲལ་རྐྱེན་བསྐུལ་མ་ལྟ་བུའི་དོན་ལོ་གསུམ་གྱི་བཞེད་པ་འགྲུབ་པའི་དུས་བབ་ཀྱི་རིང་པོར་མ་ལོན་པར་ཞྭ་ལུར་ཕེབས་ཏེ་ལོ་གསུམ་གྱི་བར་རི་ཕུག་གི་རྣམ་གྲོལ་ཡང་རྩེར་ཤིང་སྤྲེལ་ཧོར་ཟླ་བདུན་པའི་ཚེས་བཅུ་གསུམ་ནས་ཕྱི་རོལ་གྱི་རྣམ་གཡེང་མཐའ་དག་རྒྱང་དུ་བསྲིང་བར་མཛད་པའི་ཀྱེ་རྡོར་བསྙེན་ཆེན། རིགས་འཛིན་གདུང་སྒྲུབ། ནཱ་རོ་མཁའ་སྤྱོད། མ་ཧཱ་མཱ་ཡ། དགྲ་ནག །བདེ་ཆེན་རལ་གཅིག །གསང་འདུས་མི་བསྐྱོད་པ། དུས་འཁོར་སོགས་རྒྱུད་སྡེ་བཞིའི་དཀྱིལ་འཁོར་དང་ལྷ་ཕྲན་གྱི་རིམ་པ་སྐུ་ན་ཕྲ་བའི་དུས་གནང་བ་ནས་བཟུང་ད་ལམ་སྟན་ཐོག་གཅིག་ཏུ་གྲུབ་པ་ཡན་ཆད་བསྡོམས་པར་ལྕགས་འབྲུག་དམ་བཅའ་གནང་བའི་བརྒྱ་རྩ་བརྒྱད་པོ་ལྷག་དང་བཅས་པ་ལེགས་པར་སོང་བར་གོང་གི་ལྷ་གྲངས་ཀྱི་ལྗགས་བསྙེན་ཞིབ་ཆའི་ཐོ་མ་རྙེད་ཅིང་དམ་བཅའི་ལྗགས་བསྙེན་བརྒྱ་པོ་དང་རྒྱུན་བཟླས་མི་ཐེ་བའི་སྔ་ཕྱིར་མང་ཙམ་མཛད་པའི་བསྙེལ་ཐོའི་སྙིང་པོ་བསྡུས་པ་འདི་ལྟ་སྟེ། སྐྱབས་འགྲོ་བཞི་ཁྲིའི་བཞི་སྟོང་བཞི་བརྒྱ། སེམས་བསྐྱེད་སུམ་བརྒྱ། ཡིག་བརྒྱ་ཉིས་འབུམ་ཆིག་ཁྲི་དགུ་སྟོང་བརྒྱད་བརྒྱ། བཛྲ་སཏྭ་དྲུག་འབུམ་ཆིག་ཁྲི། མཎྜལ་ཉིས་སྟོང་ཉིས་བརྒྱ། བཛྲ་གུ་རུ་ས་ཡ་གཉིས་དགུ་ཁྲི་བདུན་སྟོང༌། ཚིག་བདུན་མ་བཞི་ཁྲི་བདུན་སྟོང་བདུན་བརྒྱ། སྔགས་འཆང་བསོད་ནམས་ཆོས་འཕེལ་གྱི་སྐུ་བསྟོད་སྐྱབས་གནས་མ་སུམ་ཁྲི་བརྒྱད་སྟོང་བདུན་བརྒྱ། རྡོ་རྗེ་འཆང་གི་སྐུ་བསྟོད་མཁྱེན་ལྡན་མ་ཆིག་འབུམ་བརྒྱད་ཁྲི་བཞི་སྟོང་བདུན་བརྒྱ། འཇིགས་བྱེད་ཀྱི་སྙིང་པོ་ས་ཡ་གསུམ་སུམ་འབུམ་སུམ་ཁྲི། ཉེ་སྙིང་བདུན་འབུམ་དྲུག་ཁྲི་དྲུག་སྟོང་དྲུག་བརྒྱ། ཀཱ་ལ་རཱུ་པ་བཞི་འབུམ་བཞི་ཁྲི་བཞི་སྟོང་བཞི་བརྒྱ། གསང་འདུས་ཀྱི་སྔགས་ཆིག་འབུམ། མི་གཡོ་བའི་སྔགས་བཞི་འབུམ། ཨོཾ་གསུམ་མའི་སྔགས་དྲུག་ཁྲི། རྣམ་རྒྱལ་མའི་གཟུངས་རིང་ཐུང་སྟོང་ཕྲག་རེ། དུརྒ་ཉིས་སྟོང༌། སརྦ་རཱུ་པ་ཆིག་ཁྲི་ཉིས་སྟོང༌། པདྨ་སཾ་བྷ་བའི་སྔགས་འབྲུ་བཅོ་བརྒྱད་པ་སུམ་འབུམ་སུམ་སྟོང༌། ཡིག་དྲུག་བྱེ་བ་གཅིག་ས་ཡ་གཅིག་ཉིས་འབུམ་དྲུག་ཁྲི་ལྔ་སྟོང༌། འཆི་མེད་འོད་སྣང་གི་གཟུངས་དྲུག་སྟོང༌། དྲག་སྔགས་སོ་ལྔ་པ་ཆིག་འབུམ་སུམ་སྟོང༌། རྡོ་རྗེ་གྲོ་ལོད་ཀྱི་སྔགས་བྱེ་བ་གཉིས་དང་ཆིག་སྟོང༌། དྲག་སྔགས་བཅུ་གཉིས་པ་ས་ཡ་གཅིག་དང་བཞི་འབུམ། བཀའ་བརྒྱད་བདེ་འདུས་ཀྱི་ཆེ་མཆོག་གི་གཟུངས་ས་ཡ་གཅིག་དང་ཉིས་འབུམ། མགོན་པོའི་ཡིག་བདུན་ས་ཡ་གཅིག་དང་ཉིས་འབུམ་སུམ་ཁྲི་བདུན་སྟོང༌། ལྷ་མོའི་སྔགས་བརྒྱད་ཁྲི། བོད་རྦད་ཁྲི་ཚོ་ལྔ། ཕྱག་རྡོར་གཏུམ་པོའི་སྔགས་ས་ཡ་གཅིག་དང་བདུན་འབུམ། སྒྲུབ་མཆོད་ཁ་ཐོར་ལྗགས་ཐོག་ནས་སོང་བ་ལ། ཀྱེ་རྡོར་བདུན་ཅུ་དོན་བཞི། བདག་མེད་མ་ལྔ། བདེ་མཆོག་ཉི་ཤུ་རྩ་དགུ། དུས་འཁོར་བཅོ་བརྒྱད། འཇིགས་བྱེད་ཉིས་བརྒྱ་དང་ལྔ། གཤེད་དམར་གཉིས། གསང་འདུས་བདུན་ཅུ་དོན་དགུ། མ་ཧཱ་མཱ་ཡ་གཉིས། མཁའ་འགྲོ་རྒྱ་མཚོ་བཅུ་བཞི། སངས་རྒྱས་མཉམ་སྦྱོར་ལྔ། སཾ་བུ་ཊི་ལྔ། ནཱ་རོ་མཁའ་སྤྱོད་བདུན། ཨིནྡྲ་མཁའ་སྤྱོད་གཉིས། མཻ་ཏྲི་མཁའ་སྤྱོད་གཉིས། ཕྱག་རྡོར་གཏུམ་ཆེན་བཅོ་བརྒྱད། བཀའ་བརྒྱད་བཅུ་དྲུག །ཐུགས་རྗེ་ཆེན་པོ་ཉིས་བརྒྱ་བཅུ་བཞི། ཚེ་དཔག་མེད་ཛེ་ཏཱ་རིའི་ལུགས་བརྒྱད། ཀུན་རིག་ལྔ།