སྒྲོལ་དཀྱིལ་བརྒྱད། འོད་ཟེར་ཅན་མ་བཅུ་གཅིག །རིགས་བྱེད་མ་བརྒྱད། མི་འཁྲུགས་པ་ཉི་ཤུ་རྩ་བཞི། བླ་མ་དྲག་པོ་གསུམ། རྣམ་རྒྱལ་སྟོང༌། འཆི་མེད་འོད་སྣང་བཅུ་དགུ། བསྐང་གསོ་ཁ་ཐོར་ལ་གུར་མགོན་ལ་སྟོང་དང་ལྔ་བརྒྱ་བཅུ་གསུམ། ལྷ་མོ་ལ་སྟོང་དང་སུམ་བརྒྱ་དོན་གཉིས། ཞལ་ལ་སྟོང་དང་བཞི་བརྒྱ་ང་གསུམ། ལས་མགོན་པུ་ཏྲ་དང་བཅས་པར་བརྒྱ། བེག་ཙེ་ལ་སུམ་བརྒྱ་སོ་བཞི། ལས་གཤིན་ལ་དྲུག་བརྒྱ་རེ་གཅིག །རྩིས་མགོན་ལ་སོ་གཅིག །བེང་ལ་བརྒྱ་དང་ཞེ་བརྒྱད་རྣམས་ཆ་ཤས་ཙམ་ཡིན་འདུག་རུང་རྗེས་འཇུག་རྣམས་ཀྱི་མིག་རྒྱན་ལ་ཕན་ནམ་སྙམ་གྱིས་བྲིས་སོ། །ད་ལྟའི་ཞ་ལུ་མཁན་ཆེན་ཀུན་སྤངས་པ་དེ་སྐབས་རི་ཕུག་གི་དབུ་མཛད་ཆེན་མོ་ཡིན་པ་ཐུན་འཚམས་སུ་གསུང་གླེང་དང་བཅས་འཕྲལ་འཕྲལ་ཕེབས་ཤིང་དཀྱིལ་འཁོར་རེའི་ལྗགས་བསྙེན་རྫོགས་འཚམས་ཆོས་བཀའ་ཕར་གསན་ཚུར་གསན་ཀྱང་ཅུང་ཟད་གནང་ངོ༌། །འཚོ་བ་ཆོག་ཤེས་རྒྱལ་སྲས་ཕུ་ཆུང་པ། །བདག་གཞན་མཉམ་པར་བརྗེ་ནུས་འཆད་ཀ་བ། །རབ་འཁུ་དམ་ཆོས་འཚོལ་ལ་བག་སྟོན་རྗེ། །རྩེ་གཅིག་སྒྲུབ་ལ་གཞོལ་བ་བྲག་ཕུག་པ། །ཧཱུཾ་འོད་ཉང་བན་ཐུགས་ལས་ཉེར་འཕྲོས་པས། །ཧཱུཾ་སྒྲའི་ང་རོ་ཆེར་སྒྲོག་གཏེར་སྟོན་གྱིས། །ཧཱུྃ་ནག་ཆོས་ཀྱི་བདག་པོར་བཀའ་བབས་ཞེས། །ཧཱུཾ་མཚན་ཐུགས་དགྱེས་ངང་ནས་ལྗགས་རིང་བརྐྱང༌། །ཡོམ་ཡོམ་གླིང་དགུའི་རྒྱལ་ཁམས་འདར་བའི་ཚེ། །རྔམ་རྔམ་རྡོ་རྗེ་སྲིན་པོའི་བརྟུལ་ཞུགས་ཀྱིས། །ཐིབས་ཐིབས་བསམ་ངན་འཆང་བའི་སྦྱོར་རྩུབ་མུན། །འཇིགས་འཇིགས་མངོན་སྤྱོད་རྟ་ལྗང་ཅན་དེས་སངས། །ཀུན་བཟང་བླ་མའི་ཆོས་ཀྱི་གདུང་གསོབ་ཆེད། །ཀུན་མཁྱེན་བུ་སྟོན་ཞབས་ཀྱི་དབེན་གནས་སུ། །ཀུན་དགའི་མཛའ་བ་སྟེར་བའི་བསྙེན་སྒྲུབ་ལ། །ཀུན་ཏུ་ལྷོད་མེད་ལོ་གསུམ་བཅད་རྒྱས་བཅིངས། །ལྷ་སྔགས་ཡེ་ཤེས་རྣལ་འབྱོར་མཐར་ཕྱིན་པས། །ལྷ་ཚོགས་རང་ཞལ་གཟིགས་སོགས་ངོ་མཚར་ལྟས། །ལྷ་མིའི་བློར་འདས་ཆོ་འཕྲུལ་དཔག་ཡས་ཀྱང༌། །ལྷར་བཅས་འགྲོ་ཁྱོད་མི་མངོན་བརྫུ་ལ་བརྟེན། །ཆེར་རློམ་མང་ཞིག་རྡུལ་ཕྲའི་ཡོན་ཏན་ལ། །ལའུར་ལྟོས་ཞེས་མཁའ་ལ་འཕྱར་མཐོང་ཚེ། །ཚེ་རབས་དུ་མར་གོམས་པའི་དམ་པའི་ཚུལ། །ཚུལ་མིན་རྐུན་པོའི་ནོར་ལྟར་སྦ་འདི་མཚར། །མེ་ཁྱིའི་དབྱར་སྡེ་པ་བཀྲ་ཤིས་རྩེ་པ་མཆོད་ཡོན་མཇལ་ཐོག་ལྷ་སར་གྲོངས་པ་ཡར་འདྲེན་ལ་གདན་དྲངས་ཆོག་པ་དགོས་ཚུལ་དབོན་སས་སྡེ་པ་བསོད་ནམས་རབ་བརྟན་ལ་སྙན་འབུལ་ཞུས་པ་ཁྲོལ་བར་བརྟེན་གདན་འདྲེན་གདོས་དྲག་གཤིས་ལོ་གསུམ་མཐེངས་པ་དང་འགྲིག་པའི་དེ། འཕྲལ་དུ་ཆིབས་ཁ་བསྒྱུར་ཏེ་བཀྲ་ཤིས་རྩེ་ཆོས་སྡེར་ཕེབས། སེར་ཚོགས་ཀྱི་གྲལ་དབུ་གནང་ནས་དགེ་སྒྲུབ་ཀྱི་དངོས་པོ་ཐམས་ཅད་དོན་ལྡན་སྙིང་པོར་སྨིན་པའི་འབྲས་བུ་སྦྱིན་བདག་འཁོར་བཅས་གནས་སྐབས་ལྷ་མི་དང་རིང་མིན་འཁོར་བ་མཐའ་ཅན་དུ་མཛད་པའི་རེ་བ་ཡོངས་སུ་བཀང༌། རྟ་ལུག་ཚོར་མཆོད་ཡོན་དུ་ཞུ་འབུལ་མི་གནང་བའང་གནས་སྐབས་སུ་ཐུགས་སུ་མ་ཆུན་པའི་རྣམ་པ་འདྲ་ཞིག་ཏུ་མཆིས་རུང་མ་འོངས་པའི་འབྱུང་འགྱུར་མཁྱེན་ནས་རེ་ཞིག་བཏང་སྙོམས་སུ་བཞག་པ་གོར་མ་ཆག །དེ་ཡང་བོད་དུ་འགྱུར་རོ་ཅོག་གི་རྒྱལ་བའི་བཀའ་རྣམས་ལས་རྒྱུད་ཤེར་ཕྱོགས་མདོ་ལུང་སོགས་ཀྱི་རྒྱུན་སྔོན་ནས་དར་ནའང་མདོ་མང་གི་ལུང་ཤིན་ཏུ་དཀོན་པར་གྲོ་ལུང་པ་བློ་གྲོས་འབྱུང་གནས་ཀྱིས་སྟེངས་པ་ལོ་ཙཱ་བ་རྒྱ་གར་དུ་འཚོལ་བར་བཏང་བ་དང་ཆོས་ཀྱི་རྒྱལ་པོ་འཕགས་པ་རིན་པོ་ཆེས་སྤྱིལ་བུ་པ་སྟག་སྟོན་ཤེས་རབ་འོད་ཟེར་ལ་མདོ་མང་གི་ལུང་དག་པ་ཞིག་འཚོལ་བཀའ་གནང་བ་སོགས་ལུང་རྒྱུན་མཐའ་དག་ཤབ་པ་བག་སྟོན་གཞོན་ནུ་ཚུལ་ཁྲིམས་ཀྱིས་གསན་ཞིང་བར་སྐབས་སུ་རིན་པོ་ཆེ་གྲགས་དོན་པ། བཀའ་འགྱུར་བ་ཤཱཀྱ་རྒྱལ་མཚན། ཀུན་མཁྱེན་རྡོ་རྗེ་གདན་པ་སོགས་རྒྱལ་བའི་བསྟན་པ་རིན་པོ་ཆེ་གཅེས་པར་འཛིན་པའི་སྔོན་བྱོན་དམ་པ་དུ་མའི་བཀའ་དྲིན་ལས་དར་རྒྱས་སུ་གྱུར་པ་དུས་དབང་གིས་རིམ་གྱིས་འགྲིབ་ཅིང་གྲུབ་མཐའ་སོ་སོར་ཡང་རང་རང་གི་ཆོས་ལུགས་ཀྱི་ཁ་འཛིན་ཙམ་ལས་སངས་རྒྱས་ཀྱི་བཀའ་རྣམས་སྤྱི་རྟ་སྒལ་རལ་བཞིན་དུ་ལུས་པ་རྗེ་བཙུན་བླ་མ་འདི་ཉིད་ཀྱིས་བདེ་བར་གཤེགས་པའི་རིང་ལུགས་ཀྱི་སྲོལ་འཆད་ཉན་རྩི་སྨན་ལྗོན་པས་འཐུད་པའི་སྙིང་སྟོབས་ཀྱིས་ཁུར་ཕྲག་པར་བཞེས་པའི་རྒྱུད་འབུམ་དང་འདུལ་ལུང་གཉིས་ངོར་དང་གོངས་ཀར་དུ་གསན་ཟིན་ཀྱང༌།