བཞུགས་གནས་གཙུག་ལག་ཁང་ཞིག་གསོས་ལ་བརྟེན་པའི་རྒྱ་དང་དཔངས་བསྟོད་པར་བཞུགས་སུ་གསོལ་སྐུ་རྟེན་ལ་བླ་ཆས་ཆ་འགྲིག །གསུང་རྟེན་དང་གདུང་རྟེན་ལ་ཁྲི། ཐུན་མོང་དུ་ས་རྒྱན། གནམ་རྒྱན། མཆོད་རྫས་ཀྱི་རིམ་པ་ཚར་དུ་དངར་བ་ཟླ་བ་བཞིའི་ཁོངས་སུ་ལེགས་པར་གྲུབ་པ་ལ་གོང་དཀར་ཆོས་སྡེའི་ཆོས་འཆད་པ་རབ་འབྱམས་སྨྲ་བ་རིན་ཅེན་རྒྱ་མཚོས་རྡོ་རྗེ་སློབ་དཔོན་མཛད་དེ་གཉུག་མར་གནས་པའི་དགེ་འདུན་གྱི་ཚོགས་དང་ལྷན་ཅིག་པར་ཀྱེ་རྡོ་རྗེ་མན་ངག་ལུགས་ཀྱི་རས་བྲིས་ཀྱི་དཀྱིལ་འཁོར་ལ་བརྟེན་པའི་རབ་ཏུ་གནས་པ་དང་རྟེན་བཞེངས་གནྡྷོ་ལའི་རྨང་འདིང་བ་ཚང་མའི་དུས་སུ་འཇའ་སྤྲིན། ཐན་པའི་ཚེ་ཆར་གྱི་རྒྱུན་འབབ་པ་སོགས་རྒྱལ་ཀུན་ངོ་བོ་དཔལ་ལྡན་བླ་མ་དམ་པའི་ཐུགས་དགོངས་ཆོས་དབྱིངས་སུ་རྫོགས་པའི་ངོ་མཚར་མཐའ་ཀླས་པ་བྱུང༌། གནས་གསར་སྡེ་པ་ནམ་མཁའ་དོན་དབང་དང་དབོན་མཁྱེན་རབ་རྣམ་རྒྱལ་ཡབ་སྲས་གཉིས་ཀྱིས་གོང་དཀར་རྡོ་རྗེ་གདན་དུ་གཟིམས་མལ་སྐུ་འདྲ་རིན་པོ་ཆེ་གོང་མཚུངས་བཞེངས་ཏེ་བླ་ཆས་མཆོད་རྫས་རབ་ཏུ་གནས་པས་མཐའ་བརྟེན་ནས་བླ་མ་ལྷ་ཁང་དུ་བསྒྲིགས། འཇམ་དབྱངས་མཁྱེན་བརྩེ་ཡབ་སྲས་ཀྱི་གདུང་རིན་པོ་ཆེ་དབང་གི་རྒྱལ་པོ་བཞུགས་པའི་མཆོད་རྟེན་ཞིག་དཔལ་ལྡན་བླ་མ་དམ་པ་དེ་ཉིད་ཀྱིས་དགོངས་པར་ཡོད་བཞིན་པའི་ངང་དུ་ལུས་པ་ཁུ་ལུང་གཞིས་ཀར་གསེར་དངུལ་ལས་གྲུབ་པའི་ཁྲུ་ཕྱེད་གསུམ་ཙམ་བཞེངས་པར་རིགས་ཀུན་ཁྱབ་བདག་རིན་ཆེན་བསོད་ནམས་མཆོག་གྲུབ་ཀྱིས་གཟུངས་འབུལ་དང་གསུང་རམ་པ་དང་བཅས་རྣལ་འབྱོར་རྒྱུད་དང་འགྲེལ་པའི་སྒོ་ནས་རབ་ཏུ་གནས་ཏེ་བཀྲ་ཤིས་ཀྱི་དགེ་མཚན་ཕྱོགས་ཀུན་ཏུ་ཁྱབ་པར་གྱུར་ཏོ། །ཟབ་ཆོས་དངས་མ་དཀར་མིན་མེ་ལྷའི་མཐུས། །ཉེར་སྤྱོད་བློ་ཡིས་མངལ་ལས་ཕྱིར་འཕངས་པས། །སླར་བརྩོན་གངྒཱའི་ལྟོར་སྨིན་ཀརྟི་ཀཿ །ཐོས་བསམ་སྨྱུག་མའི་ཚལ་རྒྱུ་རིང་ཞིག་འགྱངས། །ཐུབ་བསྟན་སྲོག་གི་ཟུངས་སུ་འཚོ་གཞེས་པར། །བསྐུལ་གསེལ་གཞན་ངོ་བསྲུ་བའི་གཡར་ཁྲལ་ལས། །མ་དག་ཞིང་ལ་ཉེར་སུན་ཐུགས་ཀྱི་རྩེ། །བདེ་ཆེན་ས་ལ་སྤྲོ་དགའ་སུ་ཡིས་བཟློག །འབྲས་དཀར་སྤུངས་པའི་ཆོས་སྡེར་ཞལ་ཕྱོགས་ནས། །རྨད་བྱུང་རྣམ་པར་དག་པའི་སྨོན་ལམ་གྱིས། །མཚམས་སྦྱོར་བདག་སོགས་བླ་མེད་བྱང་ཆུབ་བར། །མི་གཏོང་བཤེས་སུ་ཞལ་འཆེས་དམ་བཅར་ངེས། །ཐོས་དོན་མཚོར་འཕངས་རྡོ་བ་བྱ་ལམ་རྗེས། །ངལ་བའི་འབྲས་བུ་ཅམ་བུུ་མ་འཇོག་ཅེས། །ཕྱི་རབས་དཔྱོད་ལྡན་བསྐུལ་ཆེད་གང་གསན་ཆོས། །ངོ་མཚར་པུསྟ་ཀཿབསྒྲིག་ཆོ་ག་བསྟར། །ཁྲི་སྟན་ཟུར་བཞི་ཌཱ་ཀིས་ཉེ་བར་བཏེག །དཔའ་བོ་མཁའ་འགྲོའི་བསུན་མས་མཆོད་སྤྲིན་བཅས། །འོག་མིན་ཞིང་ཁམས་ཞིང་གི་རིགས་བདག་ཏུ། །དཔལ་ལྡན་རྡོ་རྗེ་སེམས་དཔར་བཞེངས་དེ་ཅི། །ཐུབ་བསྟན་ཆ་ཤས་བཅུ་གཉིས་ཡོངས་རྫོགས་ཤིང༌། །མཁྱེན་བརྩེ་ནུས་པའི་ཚ་ཟེར་སྟོང་འཕྲོ་བའི། །བཤེས་གཉེན་ཆོས་དབྱིངས་ཐུན་འཚམས་གཞོན་ནུའི་ཕག །གཟིམས་པའི་དུས་ཀྱི་སྐལ་ངན་ཀྱེ་མ་ཧུད། །བཻཌཱུར་ཞུན་མ་ལྟར་འཕོས་མཁའ་ངོས་ལ། །སྣ་ཚོགས་འཇའ་སྤྲིན་འོད་དྲའི་རི་མོའི་མདངས། །ལེགས་བྲིས་བཀོད་པ་བསྐྲུན་པའི་སྒྱུ་མ་ཡིས། །རྗེས་འཇུག་མྱ་ངན་གདུང་མ་གཞིལ་ལམ་ཅི། །འོན་ཏེ་གངྒཱའི་ཀླུང་གི་རྡུལ་སྙེད་ཀྱིས། །བགྲང་བར་ནུས་མིན་དག་པའི་ཞིང་ཁམས་སུ། །མཐའ་ཀླས་སྤྲུལ་པ་སྟོན་པའི་ཐུགས་རྗེའི་སྤྱན། །བདག་སོགས་གདུལ་བྱར་གཟིགས་ཚེ་ཡིད་དབང་སྤྲོ། །ཚོགས་གཉིས་ཉལ་འགྲོའི་ཕུང་པོའི་ཆུ་གཏེར་ལ། །དགེ་བའི་ཀླུང་གིས་གང་བར་ལྟོས་མིན་ཀྱང༌། །རྗེས་འབྲང་ལེགས་བྱས་ཞིང་གི་སོ་ནམ་དུ། །འཛད་མེད་རྣམ་དཀར་ཆར་རྒྱུན་ཆལ་ཆིལ་ཕོབ། །རིགས་བརྒྱའི་ཁྱབ་བདག་རྗེ་བཙུན་ཞ་ལུ་པས། །དུས་དགྲ་འཇམ་དཔལ་དམར་པོ་ལྷ་ལྔ་དང༌། །སྐུ་གདུང་རིན་ཆེན་དབང་གི་རྒྱལ་པོ་གཉིས། །དབྱེར་མེད་ངོ་མཚར་མཆོད་པ་དེ་རྨད་བྱུང༌། །དེ་ལྟར་དུས་གསུམ་རྒྱལ་བ་ཐམས་ཅད་ཀྱི་སྤྱི་གཟུགས་བཀའ་དྲིན་མཚུངས་མེད་དཔལ་ལྡན་བླ་མ་དམ་པ་ཁྱབ་བདག་རྡོ་རྗེ་སེམས་དཔའ་དང་གཉིས་སུ་མེད་པ་གང་གི་རྣམ་པར་ཐར་པ་ཆེས་ཕྲ་བ་ནི་སྤྱན་དང་མངོན་པར་ཤེས་པ་ལ་ཆགས་ཐོགས་མེད་པ་རྣམས་མ་གཏོགས་འཇིག་རྟེན་གྱི་བྱེད་པོ་ཚངས་པ་ལྟ་བུས་ཀྱང་བརྗོད་པར་མི་ནུས་ན་གཞན་དག་གིས་ལྟ་ག་ལ་ཞིག་ཐུན་མོང་བའི་གདུལ་བྱའི་སྤྱོད་ཡུལ་དུ་གྱུར་པའི་མཛད་པ་རགས་པའི་ལོ་ཟླ་ཚེས་གྲངས་ཡུལ་དང་གནས་སོགས་རྗེས་འཇུག་རྣམས་ལེ་ལོའི་མལ་དུ་འདུ་འཛིའི་གཉིད་ལ་གཡུར་བས་ཞིབ་པར་མ་རྟོགས་ཀྱང་རྒྱུས་ཡོད་ཀྱི་ཐོ་ཐོར་བུ་དང་ཡིད་གཉིས་སུ་གྱུར་པ་མང་དག་ཁྱབ་བདག་མཁན་ཆེན་ཞ་ལུ་པ་ཆེན་པོ།