sprul padma 'phrin las/ rgyal rtse bdag po byams pa ngag dbang bsod nams rgyal mtshan/ ngor mkhan po thar rtse nam mkha' rin cen e waM mkhan chen dpal gling pa bsod nams rgyal mtshan/ bye rdzing tshogs mkhan po sangs rgyas dpal bzang / gsung sprul tshul khrims rdo rje/ bang ri gter ston hU~M nag me 'bar/ skyed tshal gong mkhan po byams pa ngag dbang bstan 'dzin/ skyed tshal 'og mkhan po ngag dbang bstan pa/ dar rgyas chos sdings pa rigs 'dzin 'phrin las lhun grub/ de sras sprul sku gter ston chen po 'gro 'dul gter bdag gling pa/ rigs 'dzin chos dbang kun bzang / rje dpal 'byor gling pa ngag dbang rnam rgyal/ mtshungs med nyi ma gling pa rin cen tshul khrims bkra shis/ kun bzang rtse pa paN chen bsod nams mchog ldan/ rje kun dga' bkra shis/ rab 'byams chos rje rin cen rgya mtsho/ mdo pa chos rje dge ba'i dbang po/ shar lung rab 'byams pa/ dge slong 'phrin las rnam rgyal sogs rdo rje gdan slob dpon dang zur 'chad pa tshang ma/ do sngon chos sde'i slob dpon paN chen lung rigs/ rigs 'dzin karma gsang sngags/ sna mo shag grub chen/ sman sgom 'brang rgyas pa/ kre bo bla ma/ sgrub rnying bla ma 'jam dbyangs rgyal mtshan sogs mang du byung ba phal cher gyis gsung rgyun bzung ba'i phyogs kun tu spel nas bstan pa rin po che'i srog legs par 'thud cing la las tshe 'di'i rnam g.yeng mtha' dag rgyang du bsrings te bsam gtan gyi ro myong ba/ 'ga' zhig gis 'phrin las rnam bzhi'i sgo nas 'gro ba'i don mdzad pa sha stag byung zhing chos zhu ba po mchog dman su 'dra zhig gis kyang na yam tsam ma yin pa'i don du gnyer ba rnams la dmar 'khrid bshad bka' phyag len gang la'ang blor ma chud bar du skyo ngal med par yang yang bskyar nas ci chud mdzad/ dam pa 'di'i yon tan gyi khyad par ni sku mthong na mi mthun pa med pa'i mdzes shing brjid chags pa gzhan snang zil gyis gnon cing gang zag gcig la'ang mthong tshul ma nges pa sna tshogs su shar ba mthong ba tsam gyis nyon mongs pa dang sdug bsngal gyi rtog pa thams cad rang shugs kyis 'gags pa/ yid bde zh-ing bag phebs la dge ba dang mngon par rtogs pa'i yon tan ngang gis 'phel ba/ rang gi mnga' thang dang longs spyod kyi ched du gdams ngag mi mdzad na'ang sems can gyi don du 'gyur na der ma zad lus longs spyod la chags pa med par gzhan don sgrub pa la mi skyo ba rgyal sras 'phags pa ngan 'gro'i gnas kyang mtho ris kyi dga' tshal du gzigs pa'i ngang tshul can/ chos zhu ba'i tshogs la phogs zur gsos mthun rkyen 'tshems med dang rang gnas su 'gro ba'i tshe gnang sbyin dang thos bsam sgom sgrub kyi bslab ston blo dang 'tsham par gnang bas dpon slob 'bral mi phod pa lta bu byung / tshul khrims kyi dri ngad 'thul zhing gshegs bzhud dal brel ran pa sogs spyod lam rnams lhun chags pa/ gsung gi gdangs che chung snyoms shing ha cang dal ba dang bul ba ma yin pa'i snyan zhing 'jebs la tshig 'bru gsal bas chos gsungs pa mtha' dag nyan pa po'i tshogs kyis tshig don rtogs par sla zhing blo 'khul bas thos pa'i mod la tha mal gyi snang ba 'gags shing mi phyed pa'i dad pa thob ste rang dbang med par rje nyid ma gtogs mi re ba'i gus pa skyes