[A:༥༡༦]པས་མཐའ་བརྟེན་པ་ཀུན་རྗེས་སུ་འཛིན་པའི་ཞལ་བཞེས་ཞུས། རྡོ་རྗེ་འཆང་ཚར་པ་ཆོས་རྗེ་དང་ངོར་ཆེན་སངས་རྒྱས་སེང་གེ་ལ་ཟབ་རྒྱས་ཀྱི་ཆོས་མང་དུ་གསན། སྲས་གཉིས་ལ་སྲིད་ཀྱི་བྱ་བ་མ་ལུས་པ་གཏད་དེ་བསྐྱེད་རྫོགས་ཀྱི་རྣལ་འབྱོར་བསྙེན་སྒྲུབ་བསྐང་བ་མདོས་གཏོར་སོགས་ཐུགས་དམ་གྱིས་ཉིན་མཚན་དུས་འདའ། དེ་དག་གི་ཚེ་རྡོ་རྗེ་ཆོས་སྐྱོང་ཞལ་གཟིགས་པ། བསྲེག་མཁན་མེད་པར་ཤ་ཆེན་དྲི་ངད་འཐུལ་བ། དགུན་སྨན་རཀ་ཁོལ་བ། ལིངྒ་འགུལ་པ། ཟོར་གཏོར་འཕར་བ། མདོས་གཏོར་གྱི་གསེབ་ནས་བཙོ་རྒྱུག་པ། གམ་པ་རྫོང་དུ་ཐོག་སྡིགས་མཛུབ་ཀྱི་རྩེ་ལ་བླངས་ཏེ་གཞན་དུ་འཕངས་པ་དང༌། བོ་དོང་རྫོང་དུ་བབས་ཀྱང་མ་གནོད་ཅིང་སྡིགས་མཛུབ་དང་ཤཱ་ས་ནའི་ནུས་པས་ཧོར་དམག་བྲོས་པ། རོང་ཆུང་ངུ་རྦབ་དང་ཙག་ས་དཀར་གྲུར་ཆུ་རླབས་ཀྱི་འཇིགས་པ་སྡིགས་འཛུབ་དང་བཅས་པའི་ཕཊ་སྒྲས་བཟློག་པ། མནལ་ལམ་ལ་ཏི་ཕུ་བས་སྐུ་ཚེའི་ཚད་ལུང་བསྟན་པ་སོགས་ངོ་མཚར་རྣམས་ཆེས་དཔག་པར་དཀའ་ནའང་ཞང་སྟོན་ཆོས་འབར། རྗེ་མར་པ། མཁས་པ་གཡུ་ཐོག་པ་སོགས་ལའང་ལས་མ་དག་པའི་སྐྱེ་བོ་ཕལ་ཆེར་ཁྱིམ་པ་རང་བཞིན་པའི་མཐོང་ལས་མེད་འདུག་པ་ལྟར་འདི་སྐབས་ཀྱང་སྡེ་དཔོན་དཀྱུས་མའི་རྩིང་ཧྲལ་ཞིག་གི་ཉམས་ལས་མེད་པར་སྣང༌། དེའང་མནལ་ལམ་དུ་རི་རབ་ལ་ལན་གསུམ་བསྐོར་ཞེས་པ་སྐྱེ་བ་གསུམ་བརྒྱུད་དགོས་རྒྱུར་ལམ་ཟབ་མོའི་ཉམས་ལེན་ལ་བརྟེན་ནས་དགུང་ལོ་རེ་བརྒྱད་པ་ཁྲུམས་ཟླའི་ཚེས་བཅུའི་ཉིན་གཤེགས་ཁར་ཚར་ཆེན་ལ་