[A:༥༡༤]པས་ཉམས་གོང་འཕེལ་གྱི་རྟོགས་པ་ཀློང་དུ་གྱུར། ཐོས་གྲོལ་དང་གཅོད་ཡུལ་སོགས་ལ་བརྟེན་ནས་སྒྱུ་ལུས་རྨི་ལམ་ལ་རང་དབང་ཐོབ་པས་ལྕང་ལོ་ཅན་གྱིས་མཚོན་དག་པའི་ཞིང་མྱུལ། གམ་པ་རྫོང་དུ་ཕྱག་རྡོར་གྱི་བསྙེན་པའི་ཚེ་ཐུན་འཚམས་སུ་མར་མེ་ཤི་ཞིང་ཐུན་དངོས་ལ་རང་འབར་དུ་འགྲོ་བ། བྱང་ཆུབ་ཀྱི་སེམས་བཅོས་མིན་དུ་འཁྲུངས་ཤིང་ཀླུ་འབུམ་གཉན་ཁྲིའི་གདན་གསལ་པོར་གཟིགས་པ། མནལ་ལམ་དུ་ཁྱོད་ཁྱུང་འདི་ལ་ཞོན་ནས་རི་རབ་ལ་སྐོར་བ་ལན་གསུམ་བྱས་ཏེ་ལྕང་ལོ་ཅན་དུ་གཤེགས་པར་འགྱུར་རོ། །ཞེས་པའི་ལུང་བསྟན་རྙེད། གནོད་བྱེད་ཀྱི་ཀླུ་གདུག་པ་ཅན་བཏུལ་བ་སོགས་གསང་བདག་གིས་རྗེས་སུ་བཟུང་བར་བརྟེན། རྗེ་མཁྱེན་བརྩེའི་ཞབས་ཀྱིས། འདི་ནས་འཕོ་ཚེ་བྱང་ཕྱོགས་ལྕང་ལོ་ཅན། །ཞིང་དེར་ཕ་རྒན་དྲུང་དུ་ཐོག་མར་འགྲོ། །དེ་ནས་ཨྱོན་ཟངས་མདོག་དཔལ་རིའི་རྩེར། །སྐྱེ་བའི་རྟེན་འབྲེལ་བསྒྲིག་ལ་གསོལ་བ་འདེབས། །ཞེས་གསུང་པའི་དགོངས་གཞི་ཡང་དེ་ཡིན་ལ། སེང་གེ་རྩེ་བའི་བློན་པོ་མཛད་པ་སོགས་སྲིད་ཀྱི་རྣམ་གཡེང་དུས་འཁྲུག་ཚེ་སྐབས་ཀྱང་མཚན་བཅས་མཚན་མེད་ཀྱི་རྣལ་འབྱོར་ཡེ་མ་བཞག །སྙུན་དམ་པོས་བཏབ་པའི་དུས་ཁུ་བོ་གནས་གསར་ཆོས་མཛད་ཀྱིས་སྒྲོལ་མའི་རྗེས་གནང་མཛད་པའི་ཚེ་སྒྲོལ་མ་རི་བོ་ཙམ་པའི་སྐུ་གཟིགས་པས་སྙུན་ལས་མྱུར་དུ་གྲོལ་བོ་དོང་དུ་ཇོ་ནང་མཁན་ཆེན། རྗེ་བཙུན་སྒོ་རུམ་པ་ཆེན་པོ་ཀུན་དགའ་ལེགས་པ་རིགས་ཀྱི་བདག་པོར་བསྟེན་ནས་བདག་ལུས་ལོངས་སྤྱོད་ཐམས་ཅད་མཆོད་སྤྲིན་དུ་ཕུལ། རྗེ་ཞིང་གཞན་དུ་གཤེགས་ཁར་རིགས་བརྒྱུད་དཀར་ནག་གི་འབྲེལ་པ་བཞག་