[A:༥༣༠]བསླུ་བྲིད་བྱེད་པ་སོགས་ལྷོངས་ཚད་བསམ་གྱིས་མི་ཁྱབ་པ་བྱུང་ནའང༌། ཕུང་པོའི་གཅེས་འཛིན་བཏང་ནས་ཉལ་བསྡད་པས། ཞག་གསུམ་སོང་བ་ན་ཉམས་སྣང་ལ་བུད་མེད་བྱད་དམར་བྱང་ངེ་བ་བོང་ཆེ་ཞིང་སྐྲ་དམར་བ་ཞིག་ཕྱག་འཚལ་ཞིང༌། མཱཐཋཱརྒཱནཏཱཤཿ ཞེས་པའི་སྲོག་སྙིང་འབུལ་བ་སྙམ་བྱེད་པར་དམ་ལ་བཏགས། ཚེས་བཅུའི་ཐོ་རེངས་དགེ་སྦྱོར་རྣམས་བྱེད་འཕྲོ་ལ་གཉིད་དུ་སོང་བའི་རྨི་ལམ་དུ། གཡབས་ལྷོ་ཡིན་སྙམ་པ་ཞིག་ན་དར་སྨན་ཙེའི་ཡོལ་བ་རྒྱ་ཆེ་བར་བཏང་འདུག་པའི་ནང་ན། སྤྲུལ་སྐུ་གྲང་སོ་གཏེར་སྟོན་ཆེན་པོ་ལྕམ་སྔོན་སྡུད་མ་ཞིག་བསྣམས། རྡོ་རྗེ་དྲིལ་བུ་གསིལ་ཞིང་བཞུགས་འདུག །ཕྱག་འཚལ་ནས་འདིར་ཕེབས་པ་ཡིན་ནམ་ཞུས་པས། དྲུང་པ་འོག་གདོན་གྱིས་ཞབས་བསྙེལ་གྱི་འདུག་ཟེར་ཕྱག་རྡོར་གྱི་དབང་ཞིག་འབུལ་དུ་ཡོངས་པ་ལགས། སྒྲུབ་མཆོད་བདག་འཇུག་དང་བཅས་པ་ཚར་བདོག །ད་གསན་པས་ཆོག་པ་བདོག་གསུངས། ཕྱག་རྡོར་ཆེ་བ་བརྒྱད་སྐོར་གང་ལགས་ཞུས་པས། ཨུ་ཙ་དྲག་སྔགས་ཀྱིས་ཆེ་བའི་དབང་ཡིན་གསུང༌། སྐུ་གཞོགས་གཡས་ན་ཨུ་ཙ་ལྷ་བཅུ་དགུ་པའི་དཀྱིལ་འཁོར་ཞིག་བཀྲམ། མར་མེ་ཆེན་པོ་མང་པོ་སྤར། སྐུ་མདུན་ན་ལྕོག་ཙེའི་ཁ་ན། རྡོ་རྗེ་དྲིལ་བུ། བུམ་པ། ཅོད་པན། མཆོད་རྟེན་སྔོན་པོ་མཐོ་གང་བ་ཞིག་དང༌། ཕྱག་རྡོར་གྱི་སྐུ་ཤེལ་འདྲ་བ་ཞིག་དང༌། གཞན་ཡང་ཕྱག་མཚན་གྱི་བྱེ་བྲག་མང་པོ་འདུག །གཡོན་ན་རྡུལ་ཚོན་གྱི་གཞལ་ཡས་ཁང་མཚན་ཉིད་ཚང་བ་ཞིག་གི་དབུས་ན། པདྨ་ཕྱོགས་མདོག་འདབ་བཞིའི་ལྟེ་བ་ལ་ཁྱུང་དཀར་པོ་གཟི་བརྗིད་འབར་བ། གཤོག་པ་སྔོན་པོ་རྡོ་རྗེའི་རང་བཞིན་མེ་འོད་འཕྲོ་བ། གཡས་རྡོ་རྗེ་འཕྱར་ཞིང་གཡོན་