[A:༥༢༩]ཕྱོགས་ན་འདུལ་ཞིང་ལེགས་པོ་ཡོད་པ་དང་ཆོས་ཧ་ཅང་མི་དར་བས་དེར་ཕྱིན་ན་ཕན་པ་རྒྱ་ཆེ་ནའང༌། ད་ལམ་ལ་ཕར་ལ་མ་འབྱོན། ལོ་ཁ་ཡར་ཞིག་འདི་ཚོར་བཞུགས་ལ། ཆོས་བཀའ་ནུབ་ཉེ་བ་འདི་པ་གསོས་ཕན་སེམས་རྒྱ་བསྐྱེད་ནས་གཞན་ལ་ཆོས་མང་དུ་ཤོད། འདི་སྐད་བྱས་ན་རང་གཞན་ཀུན་ལ་ཕན་ཕྱིར་དཔེ་ཆ་མེད་པ་ཀུན་བྲིས། ཡོད་པ་ཀུན་ལྟོས། ཆོས་ཐོབ་པ་ཐམས་ཅད་བེད་མེད་ལ་མ་བཞག །ཆོས་བཀའ་དམ་པོ་བྱེད་ཟེར། ནོར་མེད་པ་ལ་མི་སྟེར་བ་དང་ཆོས་ལ་དཔེ་མཁྱུད་བྱེད་མི་ཉན་པས། སེམས་བསྐྱེད་རྒྱ་ཆེན་པོས་ཀུན་ནས་བླངས་པའི་ཆོས་ཉན་པ་དང༌། དཔེ་གཞན་ལ་སྤེལ་བ་དང༌། དེའི་དོན་རང་རྒྱུད་ལ་སྦྱོར་བ་རྣམས་མཛོད་ལ། རིམ་གྱིས་རྒྱ་གར་ནུབ་ཕྱོགས་སུ་བྱོན། ངེད་སྤུན་གསུམ་ཡང་ཁྱེད་གར་འབྱོན་སར་ཡོང་བ་ཡིན་གསུང་པ་ལ། དེ་སྐད་ཞུ་སྟེ། ཆོས་ཉན་ས་ཡང་མི་རྙེད། རྙེད་ན་ཡང་ཞུ་ས་ཡང་མི་ཡོང༌། ངས་ཆོས་བཤད་ཀྱང་ཉན་མཁན་ནི་མི་ཡོང་སྟེ། ད་ལམ་ཐབས་མི་གདའ་བས་སྡོད་ལགས་ཞུས་པས། རྟ་རྫི་ངོ་ནག་ཐིང་བྱས་རྟ་དང་བཅས་པ་ནུབ་ཕྱོགས་ཕར་ལ་འུར་སྒྲ་དང་བཅས་ནས་འཕུར་སོང་བ་དང་གཉིད་སད་པ་མཉམ་དུ་བྱུང་ངོ༌། །ས་སྤྲེལ་ཟླ་བ་དང་པོ་ནས་རྐང་པའི་ནད་དེ་ལངས་ནས། རེ་མིག་ལ་ཟླ་བ་གཉིས་པའི་ཚེས་བཞི་ལ་འགྲོ་སྨོན་ཅན་དུ་ཕྱིན། གཅོད་བཀའ་མ་དང་གསང་བ་རྨད་བྱུང་སྦྲགས་ནས་ཉམས་ལེན་གང་ལྕོགས་བྱས་པས་ཞག་གཅིག་ནས་རྐང་པ་ནས་འདྲུད་པ་དང་ཁྱི་ནག་པོས་རྨུགས་པ་སོགས་བསྡིགས་རི་དང༌། བུད་མེད་མཛེས་མ་སྔར་མ་མཐོང་བའི་བྱད་བཞིན་དང༌། གོས་རྒྱན་ཕུན་སུམ་ཚོགས་པས་