[A:༥༣༧]ཕྱོགས་ལ་ཐེགས་རྒྱུ་བའི་རྣམ་པས། རྫོང་ཞིག་གི་བརྒྱ་སྒོའི་ཕྱིར་ཕེབས་ཀྱི་འདུག་པའི་ཐེགས་སྐྱེལ་ལ་ཕྱིན་ཕྱག་འབུལ་བྱང་བས་ཕྱག་ལེན་མཛད་རྗེས་མགུལ་ཕྲག་ནས་ཞྭ་དམར་ལེགས་ཚད་ཐུབ་ཡུག་ཅིག་གནང་བྱུང་ནས་ད་འཕྲིན་ལས་ཡང་འདི་ཆེ་བ་ཡོང་བ་འདུག་པས་ད་ཕྱིས་དབུ་ཞྭ་འདི་བཞེས་ལས་འགྲོ་དོན་མཛད་པ་ཞུ་གསུང་བ་དང་གཉིད་སད། ཞལ་རས་གསལ་དྲགས་མཆི་མ་མང་པོ་ཤོར། དང་པོ་སྒོམ་ཞྭ་གོན་གསུང་གནང་སྐབས་རྟེན་འབྲེལ་འཕྱུགས་དོགས་མི་མང་ས་ལ་མང་པོར་གྱོན། ཕྱིས་སུ་གྲོལ་ཆ་ཞིག་ཞུ་སྙམ་པ་མ་གྲུབ་པའི་ངང་ནས་ཞིང་བརྗེས། ད་ཅི་དྲག་སྙམ་སེམས་མ་བདེ་བའི་ངང་ལ་ཡོད་པ་བླ་མ་ཐུགས་རྗེ་ཆེ་བས་གྲོལ་ཆ་གནང་བར་འདུག་བསམ་མོས་གུས་བགྱིས་སོ། །ན་མོ་གུ་རུ་ཤྲཱི་བཛྲ་བྷཻ་ར་ཝཱ་ཡ། བདག་དང་པོ་ནས་དཔལ་རྡོ་རྗེ་འཇིགས་བྱེད་ལ་དད་པོ་ཞིག་ཡོད་དོ། །མན་ངག་མ་ཐོབ་པས་དགེ་སྦྱོར་བྱེད་ལུགས་ཇི་ལྟ་བ་ནི་མ་བྱུང་འདུག །མྱུག་ཏུ་སླེབ་འཕྲལ་བཅུ་གསུམ་མའི་ཐོག་ནས་ཡ་མ་རཱ་ཛ་འབུམ་ཕྲག་གཅིག་བཟླས་པའི་ཚེ་ནུབ་ཅིག །རྡོ་རྗེ་འཇིགས་བྱེད་ཆེན་པོ་ཞལ་ཕྱག་ཡོངས་རྫོགས་མི་ཙམ་ཞིག་གསལ་ལམ་སྟེ་མཐོང་མ་ཐག་གཉིད་སད། ས་རྟ་ཟླ་བ་དགུ་པའི་ནང་དུ། བླ་ཆེན་རིན་པོ་ཆེའི་དྲུང་དུ་གསུང་ཆོས་ཞུ་ཡིན་རྒྱ་ཆེ་ན་ཡོད་པའི་ནུབ་ཅིག་རྨི་ལམ་དུ། བོ་དོང་བླ་བྲང་དཀར་པོའི་ཚོམས་ཆེན་གྱི་དབུས་ན་བཞུགས་གདན་ཤིན་ཏུ་མཐོ་བ་ཞིག་ལ། ལོ་ཆེན་བྱང་རྩེ་ཡིན་ཞུ་བའི་སྐུའི་རྣམ་པ་ད་ལྟ་བྲིས་ཡོད་པའི་སྐུ་འདྲ་འདི་རྣམས་སོར་བཞག་ལ། གོས་བེམ་དམར་སྨུག་ཉིས་བརྩེགས་བཞེས་པ་ཤིན་ཏུ་གཟི་བརྗིད་ཆེ་བ་ཞིག་དང༌། དེའི་སྐུ་གཞོགས་གཡོན་ན་བླ་ཆེན་ཆོས་དཔལ་བཟང་པོ་ཡིན་ཞུ་